នៅក្នុងជំនួបពិភាក្សាការងារជាមួយលោក Jean LESCURE អគ្គនាយករងទទួលបន្ទុកតំបន់អូស្យានី និងអាស៊ីអាគ្នេយ៍ នៃក្រុមហ៊ុន TOTAL Energies កាលពីថ្ងៃទី៣ មីនា ឆ្នាំ២០២២ នៅទីស្តីការក្រសួងលោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានថ្លែងថា ក្រសួងបានសហការជាមួយ UNDP បង្កើតគម្រោងកិច្ចសហប្រតិបត្តិការជំរុញការប្រើប្រាស់យានយន្ត EVs និងដើម្បីតម្លើងស្ថានីយសាកថ្ម EVs ធ្វើ​នៅតាម​ផ្លូវ​ល្បឿន​លឿន​ភ្នំពេញ-​ក្រុងព្រះសីហនុ​ចំនួន ២ កន្លែង និង​ផ្លូវជាតិ​សំខាន់ៗ​ដូចជា ផ្លូវជាតិ​ផ្លូវជាតិ​លេខ​ ៦ លេខ​ ៥ លេខ​១ ​លេខ​ ៧ នៅតាមស្ថានីយ​ប្រេងឥន្ធនៈ និងស្ថានីយ​សាកថ្ម​យានយន្ត EVs នៅក្នុង​រាជធានី​មានចំនួន ១០ ទីតាំង​។

ជំនួបពិភាក្សាការងារនេះ ផ្តោតសំខាន់លើការជំរុញផែនការអភិវឌ្ឍស្ថានីយបញ្ចូលថាមពលយានយន្តអគ្គិសនី ក៏ដូចជាដើម្បីរិះរកវិធី និងរបៀបរបបបំពេញការងាររវាងក្រសួងជាមួយនឹងក្រុមហ៊ុនទាក់ទងនឹងការបំពាក់សម្ភារឧបករណ៍បញ្ចូលថាមពលយានយន្តអគ្គិសនី (EV Charging Station) សំដៅជម្រុញការប្រើប្រាស់យានយន្តប្រភេទនេះឱ្យបានកាន់តែទូលំទូលាយនៅកម្ពុជា និងចូលរួមកាត់បន្ថយការបំពុលបរិស្ថាន។

កាលពីថ្ងៃទី២៤ ខែកុម្ភៈកន្លងទៅ ក្នុងជំនួបជាមួយ លោកស្រី Lay Cheng ឯកអគ្គរដ្ឋទូតសិង្ហបុរីប្រចាំកម្ពុជា លោក​ ស៊ុន ចាន់ថុល បានថ្លែងថា ក្រសួងបានសហការ អង្គការ UNDP ដើម្បីតម្លើងស្ថានីយសាកថ្ម EVs និងការបង្កើត Show Room សម្រាប់រថយន្តEVs គ្រោងនឹងបង្កើត ខែមីនា ឆ្នាំ២០២២ និងការរៀបចំសេចក្តីព្រាងគោលនយោបាយដឹកជញ្ជូន ផ្លូវគោកពេញលេញមួយក្នុងការជម្រុញការប្រើប្រាស់រថយន្តដើរ ដោយថាមពលអគ្គិសនី (EV) ដើម្បីចូលរួមចំណែក កាត់បន្ថយការបំភាយឧស្ម័នកាបូន។

លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនក៏ធ្លាប់បានស្នើឲ្យក្រុមហ៊ុនដឹកជញ្ជូននានាដែលមាននៅកម្ពុជាគិត និងពនិត្យលទ្ធភាពក្នុងការងាយមកប្រើប្រាស់យានយន្តថាមពលអគ្គិសនីជំនួសវិញផងដែរ៕

ប្រភព និងរូបថត៖ ក្រសួងសាធារណការ និងដឹកជញ្ជូន