ត្រឹមជាង ៣០ឆ្នាំ វៀតណាម ប្រែក្លាយជាប្រទេសផលិតកាហ្វេយក្ស

2017-05-04 05:21:03
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

វៀតណាម បានប្រែក្លាយពីប្រទេសដែលស្ទើរតែគ្មានកាហ្វេ ក្លាយជាប្រទេសនាំចេញកាហ្វេធំបំផុតមួយក្នុងលោកនាពេលបច្ចុប្បន្ន។ ត្រឹមរយៈពេលជាង ៣០ឆ្នាំ ចំណែកទីផ្សារកាហ្វេរបស់វៀតណាម បានកើនពី ០,១% ដល់ ២០% ដែលជាបម្រែបម្រួលមួយយ៉ាងលឿនមិនគួរឲ្យជឿ។

កាហ្វេក្លាយជាតួអង្គសំខាន់ក្នុងសេដ្ឋកិច្ចវៀតណាម

នៅពេលសង្គ្រាមបានបញ្ចប់នៅឆ្នាំ ១៩៧៥ សេដ្ឋកិច្ចវៀតណាមបានធ្លាក់ដល់បាត ប៉ុន្តែនៅឆ្នាំ ១៩៨៦ គណបក្សកុម្មុយនិស្តវៀតណាម បានចាប់ផ្ដើមយកកាហ្វេជាអាទិភាព។ ចាប់តាំងពីទសវត្សឆ្នាំ២៩៩០មក ផលិតកម្មកាហ្វេ បានកើនឡើងពី ២០% ទៅ ៣០% ជារៀងរាល់ឆ្នាំ។ មកទល់ឆ្នាំ២០១៤ ឧស្សាហកម្មកាហ្វេបានបង្កើតការងារឲ្យប្រជាជន ប្រហែល ២,៦លាននាក់។ កាហ្វេបានជួយបន្ថយអត្រាភាពក្រីក្ររបស់ប្រជាជនវៀតណាម ពី ៦០% មកសល់ក្រោម ១០%។

វៀតណាមក្លាយជាប្រទេសនាំចេញកាហ្វេធំបំផុតមួយ

ត្រឹមឆ្នាំ២០១៥ វៀតណាម ឈរលេខរៀងទី៣ ក្នុងនាមជាប្រទេសនាំចេញកាហ្វេច្រើនជាងគេបំផុតក្នុងលោក ស្មើនឹងទឹកប្រាក់ ២,៤ប៊ីលានដុល្លារ ឬ ៧,៩% នៃកាហ្វេនាំចេញសរុបក្នុងលោក។ ចំណាត់ថ្នាក់កំពូលទាំង ១០ រួមមាន៖

១. ប្រេស៊ីល ៥,៦ប៊ីលានដុល្លារ (១៨,២%) ២. កូឡុំប៊ី ២,៦ប៊ីលានដុល្លារ (៨,៤%) ៣. វៀតណាម ២,៤ប៊ីលានដុល្លារ (៧,៩%) ៤. អាល្លឺម៉ង់ ២,២ប៊ីលានដុល្លារ (៧,៣%) ៥. ស្វីស ២ប៊ីលានដុល្លារ (៦,៧%) ៦. អ៊ីតាលី ១,៤ប៊ីលានដុល្លារ (៤,៦%) ៧. ឥណ្ឌូណេស៊ី ១,២ប៊ីលានដុល្លារ (៤,១%) ៨. បែលហ្សិក ១,១ប៊ីលានដុល្លារ (៣,៥%) ៩. ហុងឌុយរ៉ាស់ ១ប៊ីលានដុល្លារ (៣,៤%) ១០. អេត្យូពី ១ប៊ីលានដុល្លារ (៣,៣%)

បញ្ជាក់៖ បច្ចុប្បន្ន វៀតណាម ឡើងលេខ២ បន្ទាប់ពីប្រេស៊ីល

ប្រទេសណាខ្លះ ទិញកាហ្វេពីវៀតណាម?

ឆ្នាំ២០១២/២០១៣ វៀតណាមផលិតកាហ្វេបាន ២២លានបាវ (១បាវ ទម្ងន់ ៦០គីឡូក្រាម)។ ក្នុងនោះ អាល្លឺម៉ង់ និងសហរដ្ឋអាមេរិក ទិញយកច្រើនជាងគេ (២លានបាវ) អេស្ប៉ាញ អ៊ីតាលី បែលហ្សិក លុចហ្សំបួរ (១,២លានបាវ) ជប៉ុន កូរ៉េខាងត្បូង ប៉ូឡូញ បារាំង អង់គ្លេស (០,៥លានដុល្លារ)។

សេដ្ឋីវៀតណាម មានមហិច្ឆតាធ្វើឲ្យវៀតណាមកាន់កាប់ទីផ្សារកាហ្វេពិភពលោក

ប្រជាជនវៀតណាមភាគច្រើន រស់នៅដោយសារកាហ្វេ ប៉ុន្តែមានមនុស្សមិនច្រើនទេ ដែលក្លាយជាកំពូលអ្នកមានដោយសារកាហ្វេ។ លោក Dang Le Nguyen Vu ជាមហាសេដ្ឋីកំពូលម្នាក់របស់វៀតណាម ដែលមានទ្រព្យសម្បត្តិ ១០០លានដុល្លារ (យោងតាមទស្សនាវដ្ដី Forbes)។ ក្រោយជោគជ័យក្នុងជំនួញហាងកាហ្វេក្នុងស្រុក លោកមានផែនការបង្កើតហាងកាហ្វេអន្តរជាតិដែលមានលក្ខណៈជារបៀបហាងកាហ្វេវៀតណាម ដើម្បីប្រជែងជាមួយហាងធំៗ ដូចជា Starbucks ជាដើម។ លោកនិយាយថា៖ "ប្រសិនបើយើងអាចធ្វើបាន ហើយវាយលុកទីផ្សារអាមេរិកបាន យើងនឹងកាន់កាប់ទីផ្សារកាហ្វេពិភពលោកទាំងមូល"។

ផលប៉ះពាល់នៃការដាំកាហ្វេច្រើនហួសប្រមាណ

អង្គការ WWF បានប៉ាន់ស្មានថា ព្រៃឈើ ១០ម៉ឺនគីឡូម៉ែត្រការ៉េ ត្រូវបានកាប់ ចាប់តាំងពីឆ្នាំ១៩៧៣មក ដែលភាគច្រើនគឺដើម្បីយកដីដាំកាហ្វេ។ អ្នកជំនាញ បានរកឃើញថា ដីដែលដាំកាហ្វេហើយ នឹងក្លាយជាដីដែលខ្សោះជីជាតិ ដោយសារកសិករវៀតណាម ប្រើប្រាស់ទឹក និងជីគីមីច្រើនហួសប្រមាណ៕