ក្រុមហ៊ុនអាកាសចរណ៍ម៉ាឡេស៊ី នឹងបើកជើងហោះហើរត្រង់មកកាន់ខេត្តព្រះសីហនុ

2017-05-12 09:31:36
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមហ៊ុនអាកាសចរណ៍ Air Asia នឹងបើកឲ្យមានការហោះហើរត្រង់ ពីទីក្រុងកូឡាឡាំពួរ មកអាកាសយានដ្ឋានអន្តរជាតិខេត្តព្រះសីហនុ នៅថ្ងៃទី៩ ខែសីហា ឆ្នាំ២០១៧។ ការសម្រេចនេះ ធ្វើឡើងក្រោយពីក្រុមហ៊ុនអាកាសចរណ៍ម៉ាឡេស៊ីមួយនេះ មានជើងហោះហើររបស់ខ្លួន មកកាន់អាកាសយានដ្ឋានអន្តរជាតិភ្នំពេញ និងសៀមរាប ចំនួន ៦០ដង ក្នុង ១សប្ដាហ៍ និងមានអ្នកដំណើរសរុបប្រមាណជាង ២ម៉ឺននាក់។

លោក Tony Fernandes ប្រធាននាយកប្រតិបត្តិក្រុមហ៊ុន Air Asia បានថ្លែងក្នុងសន្និសីទកាសែត នៅក្រៅវេទិកាសេដ្ឋកិច្ចពិភពលោក ស្តីពីអាស៊ាន នាព្រឹកថ្ងៃទី១២ ខែឧសភានេះថា ជើងហោះហើរត្រង់ពីកូឡាឡាំពួរ មកខេត្តព្រះសីហនុ នឹងត្រូវបើកដំណើរការលក់សំបុត្រ នៅថ្ងៃទី១៧ ខែឧសភានេះតទៅ ខណៈដែលជើងហោះហើរលើកដំបូង នឹងចាប់ផ្ដើមនៅថ្ងៃទី៩ ខែសីហា។

លោកបន្តទៀតថា ក្នុងដំណាក់កាលដំបូង ក្រុមហ៊ុននឹងធ្វើការហោះហើរឲ្យបាន ៤ដងក្នុង១សប្ដាហ៍ ហើយរំពឹងថា នឹងអាចបន្ថែមជើងហោះហើរឲ្យបានរហូតដល់ ៧ដង ក្នុង១សប្ដាហ៍ នៅពេលខាងមុខ ជាមួយនឹងក្ដីសង្ឃឹមថានឹងទទួលបានភ្ញៀវធ្វើដំណើរប្រមាណ ១០ម៉ឺននាក់ក្នុងឆ្នាំ។

លោក Tony Fernandes ក្នុងជំនួបជាមួយសម្ដេចហ៊ុន សែន

ចំណែកលោក អេរិក ដែលឡូបែល នាយកប្រតិបត្តិអាកាសចរណ៍កម្ពុជា បានថ្លែងថា គិតត្រឹមរយៈពេល ជាង ១ទសវត្សរ៍ចុងក្រោយ មានអ្នកដំណើរប្រមាណជាង ៤,៥លាននាក់ បានធ្វើដំណើរមកកម្ពុជា តាមជើងយន្ដហោះរបស់ក្រុមហ៊ុន Air Asia។

លោកបន្តថា គិតត្រឹមត្រីមាសទី១ ក្នុងឆ្នាំនេះ អាកាសយានដ្ឋានអន្តរជាតិខេត្តព្រះសីហនុ បានបំបែកកំណត់ត្រាថ្មី ដោយទទួលបានអ្នកដំណើរប្រមាណជាង ១០ម៉ឺននាក់ ពោលគឺមានកំណើនខ្ពស់ រហូតដល់ ២១០%។ អាកាសយានដ្ឋាននេះ បាននិងកំពុងសាងសង់ពង្រីកបន្ថែមនូវអគារ ទីតាំង ក៏ដូចជាហេដ្ឋារចនាសម្ព័ន្ធ ឲ្យបានរួចរាល់នៅដើមឆ្នាំក្រោយ ដើម្បីទទួលបានអ្នកដំណើរប្រមាណ ៥០ម៉ឺននាក់ក្នុងមួយឆ្នាំ៕