ចិន ធ្វើកំណែទម្រង់ទីផ្សារលើឧស្សាហកម្មប្រេង និងឧស្ម័ន

2017-05-22 04:13:52
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អាជ្ញាធរចិន កាលពីថ្ងៃទី២១ ឧសភា ម្សិលមិញ បានប្រកាសពីគម្រោងកំណែទម្រង់សម្រាប់ឧស្សាហកម្មប្រេង និងឧស្ម័នជាតិ សំដៅរកប្រសិទ្ធភាព និងការប្រកួតប្រជែងប្រសើរ ដោយផ្ដល់ឲ្យទីផ្សារមានតួនាទីសម្រេចលើវិស័យមួយនេះ។

គម្រោងនេះ ត្រូវបានឯកភាពដោយគណៈកម្មការមជ្ឈិមបក្សកុម្មុយនិស្តចិន និងក្រុមប្រឹក្សារដ្ឋចិន។ យោងតាមគម្រោងកំណែទម្រង់ បានឲ្យដឹងថា "ទីផ្សារនឹងដើរតួនាទីសំខាន់ក្នុងការប្រើប្រាស់ធនធាន ហើយរដ្ឋាភិបាលនឹងដើរតួនាទីការពារសន្តិសុខថាមពលជាតិ បង្កើនផលិតភាពឲ្យស្របនឹងតម្រូវការរបស់ប្រជាជន"។

គម្រោងនេះ បានបញ្ជាក់ពីការតាំងចិត្តរបស់ថ្នាក់ដឹកនាំចិន ដើម្បីធ្វើកំណែទម្រង់ស៊ីជម្រៅលើក្រុមហ៊ុនប្រេង និងឧស្ម័នរបស់រដ្ឋចិន ដើម្បីជំរុញឲ្យសហគ្រាសដែលមានលទ្ធភាព ក្លាយជាម្ចាស់ភាគហ៊ុន និងនាំទៅរកកំណែទម្រង់ភាពជាម្ចាស់កម្មសិទ្ធិចម្រុះ។ គោលបំណងសំខាន់ នៃកំណែទម្រង់ភាពជាម្ចាស់កម្មសិទ្ធិចម្រុះនេះ គឺដើម្បីបង្កើតយន្តការតម្រង់ទិសដៅទីផ្សារឲ្យទាន់សភាពការណ៍ និងមានប្រសិទ្ធភាព ដោយមានកិច្ចសហការជាមួយម្ចាស់ភាគហ៊ុនឯកជន ក្នុងការអភិវឌ្ឍការគ្រប់គ្រងក្រុមហ៊ុនប្រេង និងឧស្ម័នរបស់រដ្ឋ។

សូមបញ្ជាក់ថា វិស័យប្រេង និងឧស្ម័នរបស់ចិនត្រូវបានធ្លាក់ក្រោមឥទ្ធិពលក្រុមហ៊ុនរបស់រដ្ឋចំនួន ៣ មានដូចជា៖ ក្រុមហ៊ុនប្រេង CNPC ក្រុមហ៊ុនប្រេង Sinopec និងក្រុមហ៊ុន CNOOC៕

ប្រភព៖ Xinhua ប្រែសម្រួល៖ វាសនា