គិត​ចាប់​ពី​ថ្ងៃ​ដាក់​លក់​នា​អំឡុង​ខែ​តុលា ឆ្នាំ​២០១៦ រហូត​ដល់​ពី​ខែ​កុម្ភៈ ដើម​ឆ្នាំ​២០១៧ ចំនួន​ឧបករណ៍ PlayStation VR ផលិត​ដោយ​ក្រុមហ៊ុន Sony លក់​ចេញ​បាន​ចំនួន​ជាង ៩១​ម៉ឺន​គ្រឿង។ មក​ទល់​បច្ចុប្បន្ន តួ​លេខ​នេះ បន្ត​កើន​ឡើង​រហូត​ដល់​ជាង ១លាន​គ្រឿង បើ​យោង​តាម​ទិន្នន័យ​ដែល Sony បាន​ប្រកាស​កាល​ពី​ពេល​ថ្មីៗ​នេះ។

ចំនួន​លក់ VR នេះ បាន​ធ្វើ​ឲ្យ Sony ឈរ​នៅ​លំដាប់​ថ្នាក់​ទី២ បន្ទាប់​ពី​ក្រុមហ៊ុន Samsung ដែល​លក់ Gear VR បាន​ដល់ ៥​លាន​គ្រឿង​ឯណោះ។ ចំណែក HTC Vive ឈរ​នៅ​ចំណាត់​ថ្នាក់​ទី៣ លក់​ចេញ​បាន ៤២​ម៉ឺន​គ្រឿង តាម​ពី​ក្រោយ​ដោយ Oculus Rift ដែល​មាន​តួ​លេខ​លក់​ចំនួន ២៤​ម៉ឺន​គ្រឿង។

នាយក​ប្រតិបត្តិ​របស់ Sony លោក Shawn Layden បាន​អះអាង​ថា ការ​លក់ PS VR នៅ​មិន​ទាន់​គ្រប់​គ្រាន់​នៅ​ឡើយ​ទេ ព្រោះ​អី​តម្រូវ​ការ​របស់​វា​នៅ​សល់​ច្រើន​ទៀត ដោយ​ចំនួន​អ្នក​ប្រើ PlayStation 4 មាន​ដល់ ៦០​លាន​គ្រឿង ចំណែក​ឯ ចំនួន​លក់ VR បាន​ត្រឹម ១​លាន​គ្រឿង​ប៉ុណ្ណោះ។ CEO រូប​នេះ បន្ត​ថា ​តម្រូវ​ការ​ឧបករណ៍ VR មាន​ការ​ខ្វះ​ខាត​ច្រើន អំឡុង​ពេល​បុណ្យ​ណូអែល ឆ្នាំ​មុន ដោយ​សារ​តែ​ការ​ផលិត​មិន​ទាន់​ពេល​វេលា។ យ៉ាង​ណា​មិញ លោក Shawn បាន​សន្យា​ថា នឹង​ផ្គត់ផ្គង់ PS VR ឲ្យ​បាន​គ្រប់គ្រាន់ ដើម្បី​បំពេញ​តម្រូវ​ការ​អតិថិជន ត្រឹម​ចុង​ឆ្នាំ​២០១៧​នេះ៕