លោកយាយ ៨២ឆ្នាំ អ្នកបង្កើតហ្គេមទូរសព្ទ លេខមុខនៅ WWDC17

2017-06-06 07:40:55
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អ្នកចូលរួមព្រឹត្តិការណ៍ WWDC17 របស់ក្រុមហ៊ុន Apple កាលពីយប់មិញ ដែលមានវ័យចំណាស់ជាងគេ គឺលោកយាយម្នាក់ដែលមានវ័យ ៨២ឆ្នាំ។ គាត់គឺជាអ្នកបង្កើតហ្គេមនៅលើទូរសព្ទ ឈ្មោះ Hinadan ដែលមាននៅលើ App Store សម្រាប់អ្នកលេងដែលមានវ័យចំណាស់ដូចជាលោកយាយ។

Hinadan គឺជាហ្គេម ដែលធ្វើតាមការរៀបចំនៃថ្ងៃបុណ្យ Hinamatsuri ឬ ទិវាកុមារីប្រចាំឆ្នាំ ដោយប្រជាជនជប៉ុនតម្រៀបតុក្កតា តាមលំដាប់ថ្នាក់ទៅតាមឋានៈ។

ហ្គេម Hinadan

ការរៀបចំក្នុងថ្ងៃបុណ្យ Hinamatsuri

លោកយាយ Masako Wakamiya បានប្រាប់ដល់ក្រុម Developer ដែលបានចូលរួមព្រឹត្តិការណ៍ខាងលើថា មូលហេតុដែលគាត់សម្រេចចិត្តបង្កើតហ្គេមនេះឡើង ព្រោះយល់ឃើញថា បច្ចុប្បន្នសំបូរតែហ្គេមសម្រាប់ក្មេងៗ ដូច្នេះគាត់ក៏បង្កើតវាឡើងសម្រាប់មនុស្សវ័យចំណាស់ ដូចជាខ្លួន។

លោកយាយ បានបង្ហើបទៀតថា រឿងដែលពិបាកបំផុតក្នុងការបង្កើតហ្គេមនេះ គឺភាសាអង់គ្លេស ដែលលោកយាយចាត់ទុកថា ជារឿងពិបាកជាងការសរសេរកូដបង្កើតហ្គេមទៅទៀត។

លោកយាយ Masako Wakamiya

លោកយាយ រៀនពីវិធីបង្កើតតាមរយៈគ្រូបង្រៀនម្នាក់ដែលរស់នៅឆ្ងាយពីខ្លួនរាប់រយគីឡូម៉ែត្រ ហើយអ្នកទាំងពីរបានទាក់ទងគ្នាតាមរយៈបណ្ដាញសង្គម Skype និងសេវាកម្មសម្រាប់ផ្ញើសារអេឡិចត្រូនិកផ្សេងៗ។ ហ្គេម Hinadan ត្រូវបានបង្កើតឡើងកាលពី ៥-៦ ខែមុន៕

ប្រភព៖ The Nation ប្រែសម្រួល៖ លាភ.