ក្រុមគ្រួសារបណ្ឌិត កែម ឡី គ្រោងរៀបចំពិធីបុណ្យខួប១ឆ្នាំនៅខេត្តតាកែវ

2017-06-11 03:05:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមគ្រួសារលោកបណ្ឌិត កែម ឡី អំពាវនាវដល់ប្រជាពលរដ្ឋដែលគោរពស្រលាញ់លោកបណ្ឌិត កែម ឡី ឲ្យចូលរួមបុណ្យខួប ១ឆ្នាំដែលគ្រោងនឹងរៀបចំនៅទីតាំងតម្កល់សពនៅស្រុកកំណើតតែម្ដង។

គណៈកម្មការរៀបចំចេតិយតម្កល់សពលោកបណ្ឌិត កែម ឡី កំពុងតែពិគ្រោះយោបល់គ្នាពីការរៀបចំពិធីបុណ្យនេះ ហើយលទ្ធផលពិតប្រាកដនឹងចេញក្នុងពេលឆាប់ៗនេះ។ គិតមកដល់ពេលនេះ មានរយៈពេល ១១ខែគត់នៃឃាតកម្មលើអ្នកស្រាវជ្រាវពីបញ្ហាសង្គម និងនយោបាយដ៏មានប្រជាប្រិយភាព ប៉ុន្តែក្រុមគ្រួសារចាត់ទុកថា យុត្តិធម៌ដែលទទួលបានតាមរយៈការជំនុំជម្រះនៅតុលាការ គឺមិនទាន់ឃើញពន្លឺនៅឡើយទេ។

រូបសំណាកបណ្ឌិត កែម ឡី ត្រូវបានដាក់តម្កល់នៅក្នុងរោងបុណ្យខួប ១០០ថ្ងៃ នាវត្តចាស់ នៅថ្ងៃទី១៤ តុលា ឆ្នាំ២០១៦។ RFA/Chuop Sereyroth

ការអំពាវនាវនេះត្រូវបានក្រុមគ្រួសារលោកបណ្ឌិត កែម ឡី អះអាងថា គឺស្មើនឹងមានលិខិតអញ្ជើញចំពោះពលរដ្ឋដែលធ្លាប់មានភក្ដីភាពចំពោះលោកបណ្ឌិត កែម ឡី ដើម្បីបានចូលរួមពិធីបុណ្យដែលគ្រោងនឹងរៀបចំនៅចំថ្ងៃដែលឃាតកបាញ់សម្លាប់លោកបណ្ឌិត កែម ឡី នៅខែកក្កដា ខាងមុខនេះ។

ម្ដាយរបស់លោកបណ្ឌិត កែម ឡី គឺលោកស្រី ភោគ សេ ឲ្យដឹងនៅថ្ងៃទី១០ ខែមិថុនា ថា ពិធីបុណ្យដែលគ្រោងរៀបចំឡើងទៅតាមការគ្រោងទុកនៅពេលខាងមុខនេះ គឺពុំមានគណៈកម្មការរៀបចំបុណ្យចាត់ចែងដូចមុនទៀតទេ។

ស្ថិតក្នុងវ័យ ៧៨ឆ្នាំ លោកស្រីបន្តថា ពិធីបុណ្យគម្រប់ខួប១ឆ្នាំនៃឃាតកម្មលើលោកបណ្ឌិត កែម ឡី នេះនឹងរៀបចំក្នុងទ្រង់ទ្រាយធំ ដោយចាប់ប្រារព្ធពិធីនៅថ្ងៃទី៩ និងបញ្ចប់ទៅវិញនៅថ្ងៃទី១០ ខែកក្កដា៖ ធ្វើតាមស្រុកស្រែទេ។ ប៉ុន្តែបើភ្ញៀវអត់បានប្រាប់ទេ ជួយប្រកាសតាមវិទ្យុផង។

ការអំពាវនាវនេះ ស្របពេលនៅថ្ងៃទី១០ ខែមិថុនា នេះ គឺជារយៈពេល ១១ខែគត់ដែលឃាតកម្មបាញ់ប្រហារលោកបណ្ឌិត កែម ឡី កាលពីថ្ងៃទី១០ ខែកក្កដា ឆ្នាំ២០១៦ ទាំងព្រឹកព្រលឹម កណ្ដាលទីក្រុងភ្នំពេញ៕

ប្រភព៖ Radio Free Asia ប្រែសម្រួល៖ សំភី