ក្រុម​បាល់ទាត់​ជម្រើស​ជាតិ​អាយុ​ក្រោម ២០​ឆ្នាំ អង់គ្លេស បាន​យក​ឈ្នះ​ក្រុម​វេណេហ្ស៊ុយអេឡា ក្នុង​លទ្ធផល ១-០ នៅ​វគ្គ​ផ្តាច់ព្រ័ត្រ FIFA U20 World Cup 2017 កាលពី​ម្សិលមិញ ដែល​ប្រទេស​កូរ៉េខាងត្បូង​ធ្វើ​ជា​ម្ចាស់ផ្ទះ។

ខ្សែ​ប្រយុទ្ធ​វ័យ ២០ឆ្នាំ Calvert-Lewin របស់​ក្លឹប Everton បាន​ស៊ុត​បញ្ចូល​ទី​តែ​មួយ​គ្រាប់​គត់ និង​ជា​គ្រាប់​ជ័យ​ជម្នះ​សម្រាប់​ក្រុម​អង់គ្លេស នៅ​នាទី​៣៥។ កីឡាករ​រូប​នេះ បាន​ព្យាយាម​ទាត់​តម្រង់ទី​តែ​ត្រូវ​បាន​ជួយ​សង្គ្រោះ​ដោយ​អ្នកចាំទី​វេណេហ្ស៊ុយអេឡា Wuiker Farinez។ យ៉ាងណាមិញ បាល់​បាន​ខ្ទាត​ចេញ​ពី​ដៃ​របស់ Farinez ធ្វើ​ឲ្យ Lewin បន្ថែម​បញ្ចូល​ទី​បាន​សម្រេច។

ក្រុម​វេណេហ្ស៊ុយអេឡា បាន​ខកខាន​ឱកាស​ក្នុង​ការ​ទាត់​បាល់​ប៉េណាល់ទី បន្ទាប់​ពី​អ្នកចាំទី​អង់គ្លេស Freddie Woodman ជួយ​សង្គ្រោះ​បាន​ពី​ការ​ទាត់​របស់ Adalberto Penaranda ក្នុង​តង់ទីពីរ។

ជ័យ​ជម្នះ​នេះ បាន​ធ្វើឲ្យ​ក្រុម​បាល់ទាត់​ជម្រើស​ជាតិ​អាយុ​ក្រោម ២០​ឆ្នាំ អង់គ្លេស ក្លាយជា​ម្ចាស់​ជើងឯក U20 World Cup ជា​លើក​ដំបូង ក្នុង​ប្រវត្តិសាស្ត្រ៕