ខ្សែប្រយុទ្ធម៉ិកស៊ីកូ ថាយប់នេះ ក្រុមរបស់ខ្លួននឹងបិទ Ronaldo ឲ្យជាប់

2017-06-18 08:14:24
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កីឡាករ Raul Jimenez ខ្សែប្រយុទ្ធក្រុមបាល់ទាត់ជម្រើសជាតិម៉ិកស៊ីកូ បានបង្ហាញជំនឿចិត្តថា សមាជិកក្រុមរបស់ខ្លួន នឹងការពារមិនឲ្យ Cristiano Ronaldo រកគ្រាប់បាល់បានឡើយ។ ការលើកឡើងនេះ គឺមុនពេលម៉ិកស៊ីកូ ជួប ព័រទុយហ្គាល់ ក្នុងពូល A នៃពានរង្វាន់ FIFA Confederation Cup យប់នេះ។

Raul Jimenez

Jimenez បាននិយាយនៅលើវិបសាយផ្លូវការរបស់ Confederation Cup ថា៖ "ពិតណាស់ Ronaldo ជាកីឡាករដ៏អស្ចារ្យ តែក្រុមយើងក៏អស្ចារ្យដូចគ្នា ហើយខ្ញុំប្រាកដណាស់ថាយើងនឹងអាចបញ្ឈប់គាត់បាន។ វាមិនសំខាន់ថាយើងជាកីឡាករល្បីឬអត់ ឬលេងនៅលីគល្បីឬអត់នោះទេ អ្វីដែលសំខាន់បំផុត គឺយើងរួបរួមគ្នាជាធ្លុងមួយ ហើយប្រយុទ្ធជាមួយគ្នា ដើម្បីជ័យជម្នះ"។

Raul Jimenez ជាតួអង្គដ៏សំខាន់មួយរូបសម្រាប់ក្រុមម៉ិកស៊ីកូ ហើយអ្វីដែលគួរឲ្យកត់សម្គាល់មួយទៀត គឺខ្សែប្រយុទ្ធវ័យ ២៦ឆ្នាំរូបនេះ កំពុងប្រកបអាជីពនៅក្លឹប Benfica ដែលជាក្លឹបរបស់ព័រទុយហ្គាល់។

Ronaldo ហ្វឹកហាត់ត្រៀមប្រកួតយប់នេះ

ការប្រកួតរវាងម៉ិកស៊ីកូ និងព័រទុយហ្គាល់ នឹងធ្វើឡើងនាម៉ោង ១០យប់ នេះ (ម៉ោងនៅកម្ពុជា)។ លទ្ធផលក្នុងពូល A មួយគូកាលពីយប់ថ្ងៃសៅរ៍ គឺ ម្ចាស់ផ្ទះរុស្ស៊ី ឈ្នះ នូវែលហ្សេឡង់ ២-០៕

វីដេអូការហ្វឹកហាត់របស់ម៉ិកស៊ីកូ៖

វីដេអូការហ្វឹកហាត់របស់ព័រទុយហ្គាល់៖

ប្រភព៖ FIFA ប្រែសម្រួល៖ សុខ សុវត្ថិ