ចិន បាន​ព្រមាន​ឥណ្ឌា សារជា​ថ្មី ឱ្យ​នៅឆ្ងាយ​ពី​បញ្ហា​សមុទ្រ​ចិន​ខាងត្បូង និង​ភូមិសាស្រ្ត​ដែលនៅ​ជុំវិញ​ចិន។ ការ​ព្រមាន​នេះ ធ្វើឡើង​មុនពេល នាយក​រដ្ឋមន្រ្តី​ឥណ្ឌា លោក Narendra Modi នឹង​ធ្វើ​ទស្សនកិច្ច​នៅ​អាមេរិក នាថ្ងៃ​ទី២៥​មិថុនា។

ជំនួប​រវាង​លោក Modi និង​លោក ដូណាល់ ត្រាំ ប្រធានា​ធិបតី​អាមេរិក ត្រូវបាន​រំពឹង​ថា នឹង​ពិភាក្សា​អំពី​បញ្ហា​សមុទ្រ​ចិន​ខាងត្បូង។

អ្នក​នាំពាក្យ​ក្រសួង​ការបរទេស​ចិន លោក Geng Shuang បាន​និយាយ​ម្សិលមិញ​ថា ឥណ្ឌា និង​អាមេរិក មិនគួរ​បង្ក​ការ​រំខាន​ដល់​សន្តិភាព​ក្នុង​សមុទ្រ​ចិន​ខាងត្បូង​ឡើយ។ កិច្ច​ប្រឹងប្រែង រក​ដំណោះស្រាយ​រវាង​ចិន និង​អាស៊ាន បាន​ធ្វើឱ្យ​ភាព​តានតឹង មានការ​ថយចុះ។ លោក​សង្ឃឹម​ថា ប្រទេស​ដែលមិន​ពាក់ព័ន្ធ​ក្នុង​ជម្លោះ​នេះ អាច​គោរព និង​ថែរក្សា​ស្ថិរភាព និង​សន្តិភាព ក្នុង​តំបន់​នេះ​បាន៕