Booysen៖ Muangthong ឆ្នាំនេះល្អទាំងព្រម យើងមិនងាយឈ្នះស្រួលៗទេ

2017-07-12 09:42:52
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

Shane Booysen ខ្សែប្រយុទ្ធក្លឹបភ្នំពេញក្រោន ដែលជាប់ឈ្មោះក្នុងក្រុម K-Cement Cambodian All Stars ជាលើកទី២ បានបង្ហើបចំណាប់អារម្មណ៍ថា ក្រុម SCG Muangthong United នៅឆ្នាំនេះបានរៀបចំក្រុមបានល្អជាងឆ្នាំមុន ដូច្នេះប្រកួតថ្ងៃ១៦ ខែកក្កដាខាងមុខនេះ នឹងកាន់តែជក់ចិត្ត។

Booysen បញ្ជាក់ថា ក្រុមកម្ពុជា មិនងាយឈ្នះការប្រកួតនេះស្រួលៗឡើយ ព្រោះ Muangthong មកលើកនេះ គឺលើកគ្នាមកទាំងក្រុមធំតែម្ដង។ យ៉ាងណាក្ដី ខ្សែប្រយុទ្ធអាហ្រ្វិកខាងត្បូងរូបនេះ បានសន្យានឹងអ្នកគាំទ្រ ថាខ្លួននឹងប្រឹងប្រែងលេងឲ្យល្អបំផុតដូចកាលឆ្នាំមុន ដើម្បីអ្នកគាំទ្រសប្បាយចិត្ត។

Booysen ពេលប្រកួតឈ្នះ Cambodian All Star កាលពីឆ្នាំមុន

មិនខុសពីការលើកឡើងនេះទេ ក្លឹប Muangthong បានបញ្ជាក់ថានឹងនាំយកកីឡាករពេញជើងតែម្ដង ដើម្បីធ្វើឱ្យការប្រកួតកាន់តែជក់ចិត្ត និងសងសឹកសម្រាប់ការបរាជ័យកាលពីឆ្នាំមុន។ ក្រុមម្ចាស់ជើងឯកលីគកំពូលថៃមួយនេះ នឹងមកដល់កម្ពុជានៅថ្ងៃព្រហស្បតិ៍ ទី១៣ ខែកក្កដាស្អែកនេះ។

សូមរំលឹកផងដែរថា កាលពីឆ្នាំ២០១៦ ក្រុម Muangthong United បានចាញ់ K-Cement Cambodian All Star ក្នុងលទ្ធផល ៣-៤ នៅពហុកីឡដ្ឋានជាតិ ក្រោមក្រសែភ្នែកអ្នកគាំទ្រកម្ពុជារាប់ម៉ឺននាក់។ តើការជួបគ្នាឆ្នាំនេះ Muangthong អាចសងសឹកបានដែរឬទេ?

អត្ថបទ៖ សុខ មុន្នីរម្យ