គ.ជ.ប បង្ហាញកត្តា ៧ចំណុច ដែលនាំឲ្យការរៀបចំការបោះឆ្នោត ទទួលជោគជ័យ

2017-07-16 09:03:31
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អនុប្រធាន គ.ជ.ប លោក គួយ ប៊ុនរឿន បញ្ជាក់ថា កត្តាសំខាន់ៗ ដែលនាំឲ្យការរៀបចំការបោះឆ្នោតជ្រើសរើសក្រុមប្រឹក្សាឃុំ-សង្កាត់ ប្រព្រឹត្តទៅដោយជោគជ័យ គឺ៖ ១. អំពីក្របខណ្ឌច្បាប់ និងបទបញ្ជា។ ២. អំពីរចនាសម្ព័ន្ធគ្រប់គ្រង។ ៣. អំពីការចុះឈ្មោះបោះឆ្នោត ដើម្បីរៀបចំបញ្ជីបោះឆ្នោតថ្មី។ ៤. អំពីការអប់រំអ្នកបោះឆ្នោត និងសាធារណជន។ ៥. អំពីការប្រើប្រាស់ទូរទស្សន៍ និងវិទ្យុរបស់រដ្ឋ។ ៦. អំពីតម្លាភាព នៃការផ្សព្វផ្សាយលទ្ធផលបឋម នៃការបោះឆ្នោត និងទី៧ អំពីការដោះស្រាយពាក្យបណ្តឹង។ លោកឲ្យដឹងដូច្នេះ ក្នុងសន្និបាតបូកសរុបការងាររៀបចំការបោះឆ្នោត កាលពីព្រឹកថ្ងៃទី១៦កក្កដា នៅខេត្តព្រះសីហនុ។

លោក គួយ ប៊ុនរឿន អនុប្រធាន គ.ជ.ប

លោក គួយ ប៊ុនរឿន និយាយថា ទោះបីជាការរៀបចំបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៤ ឆ្នាំ២០១៧ សម្រេចបានលទ្ធផលជោគជ័យយ៉ាងណាក៏ដោយ ក៏នៅតែមានចំណុចខ្វះខាតមួយចំនួនត្រូវដោះស្រាយ ដោយរាល់ការបោះឆ្នោត មិនអាចធ្វើបានល្អឥតខ្ចោះ ១០០ភាគរយនោះទេ។

លោកបានបន្តថា ប្រធានបទដែលលើកយកមកពិភាក្សាមាន ៥ចំណុច រួមមាន ទី១ ការចុះឈ្មោះបោះឆ្នោត ដើម្បីរៀបចំបញ្ជីបោះឆ្នោតថ្មី ឆ្នាំ២០១៦។ ទី២ ការចុះបញ្ជីបេក្ខជន នៃគណបក្សនយោបាយ និងការឃោសនាបោះឆ្នោត។ ទី៣ ការបោះឆ្នោត និងការរាប់សន្លឹកឆ្នោត ការបញ្ជូនលទ្ធផលបឋម (ទម្រង់ ១១០២ និងទម្រង់ ១១០៥ )។ ទី៤ ការដាក់ ការទទួល និងដោះស្រាយពាក្យបណ្តឹង។ និងទី៥ ការបណ្តុះបណ្តាលអប់រំ អ្នកបោះឆ្នោត និងសាធារណជន៕