ច្រឹង ពលរដ្ឋ ថាក្រុម U23 កម្ពុជា វាយបកយឺតជាងក្រុមឈុតធំ

2017-07-20 07:22:06
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ច្រឹង ពលរដ្ឋ ខ្សែបម្រើដែលជាប់ឈ្មោះក្នុងក្រុមជម្រើសជាតិឈុតធំ និង U23 បានបញ្ជាក់ថា ក្រុម U23 មានសមត្ថភាពវាយបកយឺត ផ្ទុយពីជម្រើសជាតិឈុតធំ ដែលអាចវាយបកបានលឿន។

ឆ្លើយក្នុងសន្និសីទសារព័ត៌មានក្រោយប្រកួតស្មើ U23 ចិនយប់មិញ កីឡាករមានដើមកំណើតនៅភ្នំពេញរូបនេះ បានឲ្យដឹងថា U23 លេងមិនទាន់យល់ចិត្តខ្លាំងដូចក្រុមជម្រើសជាតិឈុតធំនោះទេ ពោលគឺនៅមានចន្លោះប្រហោងច្រើនជាងក្រុមឈុតធំ ពិសេសខ្សែប្រយុទ្ធបង្កើតឱកាសវាយបកនៅយឺត។

ងាកទៅការត្រៀមប៉ះ U23 ជប៉ុនវិញ ពលរដ្ឋ លើកឡើងថា ទោះបីការសម្រាកមានរយៈពេលតិចក៏ស្ថានភាពកម្លាំងរបស់គេអាចប្រមូលម្ដុំវិញទាន់ពេលវេលា ដើម្បីត្រៀមជួយកម្ពុជា។

ក្រុម U23 កម្ពុជា នឹងត្រូវប៉ះក្រុមខ្លាំង U23 ជប៉ុន ក្នុងប្រកួតទី២ ពូល J នៃវគ្គជម្រុះ AFC U23 Championship នាថ្ងៃសុក្រស្អែកនេះ វេលាម៉ោង ៦:៣០នាទី។ ប្រកួតទី១ ក្រុម U23 ជប៉ុន បំបាក់ U23 ហ្វីលីពីន ៨-០ ឯ U23 កម្ពុជា ស្មើ U23 ចិន ០-០៕