បញ្ហាពីរ មិនអាចរារាំងក្រុមវ៉ូវីណាមកម្ពុជាពីការដណ្ដើមមេដាយបានឡើយ

2017-08-07 04:07:37
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមកីឡាវ៉ូវីណាមកម្ពុជា បានត្រឡប់មកដល់មាតុភូមិវិញ នាព្រឹកថ្ងៃទី៧ ខែសីហា ឆ្នាំ២០១៧នេះ ដោយនាំយកមកជាមួយនូវមេដាយចំនួន ២២គ្រឿង ក្នុងនោះមាន មេដាយមាស ៤គ្រឿង ប្រាក់ ៩គ្រឿង និងសំរឹទ្ធ ៩គ្រឿង ព្រមទាំងពានរង្វាន់ចំណាត់ថ្នាក់លេខ៣ ក្នុងចំណោម ៤៥ប្រទេស ពីការប្រកួតកីឡាវ៉ូវីណាមជើងឯកពិភពលោកលើកទី៥ នៅប្រទេសឥណ្ឌា កាលពីពេលថ្មីៗកន្លងទៅ។

រូបភាព៖ គណៈកម្មាធិការជាតិអូឡាំពិកកម្ពុជា

ក្រោយមកដល់អាកាសយានដ្ឋានអន្តរជាតិភ្នំពេញ ក្រុមកីឡាករ កីឡាការិនី ម្ចាស់មេដាយកីឡាវ៉ូវីណាម បានបង្ហាញចំណាប់អារម្មណ៍សប្បាយរីករាយ ចំពោះការទទួលបានជោគជ័យនៅលើឆាកអន្តរជាតិ។ ក្រុមកីឡាករ កីឡាការិនី បានបង្ហើបពីបញ្ហាមួយចំនួនក្នុងអំឡុងដំណើរចូលរួមប្រកួតនៅឥណ្ឌា គឺបញ្ហាអាកាសធាតុ និងម្ហូបអាហារ។ ទោះជាយ៉ាងណា កត្តាទាំងនេះមិនបានរារាំងពួកគេក្នុងការដណ្ដើមមេដាយជូនជាតិមាតុភូមិឡើយ។

ក្រុមវ៉ូវីណាមកម្ពុជា បានលើកឡើងថា ជោគជ័យនេះបានពីការខិតខំហ្វឹកហាត់ ជាពិសេសការយកចិត្តទុកដាក់ពីថ្នាក់ដឹកនាំ និងប្រធានសហព័ន្ធកីឡាវ៉ូវីណាមកម្ពុជា លោក រ័ត្ន សុខន លើកីឡាករ កីឡាការិនីដើម្បីបង្ហាញពីបច្ចេកទេសផ្សេងៗ សម្រាប់ពួកគេអនុវត្ត។

សូមបញ្ជាក់ថា ក្បូនម៉ូតូធំចំនួន ១២គ្រឿង ក៏បានដង្ហែក្រុមប្រតិភូកីឡាវ៉ូវីណាមកម្ពុជា ពីអាកាសយានដ្ឋានអន្តរជាតិភ្នំពេញ ទៅកាន់ទីស្នាក់ការគណៈកម្មាធិការអូឡាំពិកកម្ពុជាផងដែរ៕