អ្នកភូមិម្នាក់ ប្រគល់ ខួចបៃតង អាយុកាលជាង ១ពាន់ឆ្នាំ ឲ្យអាជ្ញាធរជាតិអប្សរា

2017-08-24 03:28:06
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អាជ្ញាធរជាតិអប្សរា បានឲ្យដឹងនៅព្រឹកថ្ងៃទី២៤សីហានេះថា លោក កង ល័រ ជាអ្នកភូមិត្នោតជ្រុំ ឃុំដូនកែវ ស្រុកពួក ខេត្តសៀមរាប បានប្រគល់ ខួចបៃតង សម័យអង្គរ (ស.វទី៩-១០) ជូនអាជ្ញាធរជាតិអប្សរា ដើម្បីរក្សាទុក។

លោក កង ល័រ រើសបានខួចនេះប្រហែល ៣ខែហើយ ពេលជីកបង្គោលធ្វើទ្រុងចិញ្ចឹមទាកាប៉ា ដែលស្ថិតនៅភូមិត្នោតជ្រុំ។ ពេលរើសបានដំបូង លោកមិនដឹងថាជាវត្ថុបុរាណ ឬមានតម្លៃទេ ក៏មិនដឹងប្រវត្តិអីដែរ ហើយចេះតែរក្សាទុកទៅ ព្រោះមិនដឹងថាយកទៅឲ្យអ្នកណា។

លោក កង ល័រ អ្នកភូមិត្នោតជ្រុំ

លុះពេលថ្មីៗនេះដឹងថា អាជ្ញាធរជាតិអប្សរាមានសមត្ថកិច្ចទទួលរក្សាទុក និងមានជំនាញទាំងជួសជុល អភិរក្ស ក៏ដូចជាដឹងពីប្រវត្តិនៃខួចនេះផង លោកក៏សម្រេចប្រគល់ជូនដើម្បីរួមចំណែកក្នុងការថែរក្សាវត្ថុដូនតារួមគ្នា។

លោក កង ល័រ សំណូមពរឲ្យប្រជាជនដទៃទៀតដែលរើស ឬជីកបានវត្ថុបុរាណ គួរយកមកឱ្យអ្នកមានសមត្ថកិច្ចមើលការខុសត្រូវ ជាជាងការលក់ដូរឱ្យឈ្មួញ ឬបំផ្លិចបំផ្លាញចោល។

លោកបណ្ឌិត អ៊ា ដារិទ្ធ អនុប្រធានមជ្ឈមណ្ឌលអន្តរជាតិស្រាវជ្រាវ និងតម្កល់ឯកសារអង្គរ ជំនាញផ្នែកកុលាលភាជន៍ បានឲ្យដឹងថា នេះជាខួចបៃតង (Green Glazed) ដែលផលិតនៅសម័យអង្គរ ស.វទី៩ដល់ទី១០។

តាមរយៈខួចនេះដែរ គឺមានស្រទាប់រលោងស្អាត ដែលអាចដឹងថា ភាគច្រើនគឺផលិតនៅឡអន្លង់ធំ និងឡឫស្សី។ គេប្រើវាសម្រាប់ដាក់វត្ថុរាវដូចជាថ្នាំឬទឹកឃ្មុំជាដើម។ លោកបណ្ឌិត ក៏បានបញ្ជាក់ដែរថា ខួច និងវត្ថុផ្សេងៗប្រភេទពណ៌បៃតងនេះ គេឈប់ឃើញមានផលិតបន្តទៀត ដោយជំនួសនូវការផលិតកុលាលភាជន៍ពណ៌ត្នោតវិញម្តងចាប់ពីស.វទី១១ ដល់ស.វទី១៣ នៃគ.ស៕