"មុនដំបូងខ្មែរក្រហមសម្លាប់ប៉ារបស់ខ្ញុំ" ត្រូវប្រជែងជាមួយរឿងបរទេសជិត ១០០រឿងក្នុងពានអូស្ការ

2017-09-22 07:36:40
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ខ្សែភាពយន្ត "មុនដំបូងខ្មែរក្រហមសម្លាប់ប៉ារបស់ខ្ញុំ" ឬ "First They Killed My Father" ជាបេក្ខភាពមួយក្នុងចំណោមបេក្ខភាពខ្សែភាពយន្តជាច្រើនទៀត ដែលត្រូវដណ្ដើមយកពានរង្វាន់អូស្ការ លើផ្នែក "ខ្សែភាពយន្តនិយាយភាសាបរទេសល្អបំផុត" ឬ “Best Foreign Language Film"។

អ្នកដឹកនាំរឿង Angelina Jolie និងអ្នកស្រី អ៊ឹង លួង អ្នកនិពន្ធរឿង "មុនដំបូងខ្មែរក្រហមសម្លាប់ប៉ារបស់ខ្ញុំ"

យ៉ាងហោចណាស់ ខ្សែភាពយន្តបរទេស ៩០រឿង ត្រូវបានដាក់ចូលប្រកួតប្រជែងក្នុងពានរង្វាន់នេះ មុនថ្ងៃបិទឈប់ទទួលបេក្ខភាពនៅថ្ងៃទី២ ខែតុលា។ រឿងទាំងអស់នោះ នឹងត្រូវជម្រុះសល់ ៩រឿង រួចបន្តជម្រុះសល់ត្រឹម ៥រឿង សម្រាប់ប្រជែងគ្នាយកពាន "Best Foreign Language Film” របស់ពានរង្វាន់អូស្ការ លើកទី៩០ ឆ្នាំ២០១៨។

ខ្លីៗ សូមលើកយកខ្សែភាពយន្តគួរឲ្យចាប់អារម្មណ៍មួយចំនួន ដែលត្រូវប្រជែងនឹងរឿង "First They Killed My Father”៖

រឿង “The Square” ជាភាសាស៊ុយអែត។ រឿងនេះបានឈ្នះពានរង្វាន់ Palme d'Or ដែលជាពានរង្វាន់ធំបំផុតក្នុងមហោស្រពភាពយន្តទីក្រុងកាន។ រឿងនេះសរសេរ និងដឹកនាំដោយលោក Ruben Östlund និងសម្ដែងដោយតារាល្បី Claes Bang, Elisabeth Moss និង Dominic West។

រឿង “In the Fade” ជាភាសាអាល្លឺម៉ង់។ In the Fade ក៏ស្ថិតក្នុងចំណោមរឿងដ៏លេចធ្លោមួយដែរ ក្រោយតារាសម្ដែងក្នុងរឿងនេះ គឺនាង Diane Kruger បានឈ្នះពានរង្វាន់តារាស្រីល្អបំផុត ក្នុងមហោស្រពភាពយន្តទីក្រុងកាន។ រឿងនេះដឹកនាំដោយលោក Fatih Akin។

រឿង "120 Beats per Minute” ឬ BMP (Beats per Minute) ជាភាសាបារាំង។ រឿងនេះ ដឹកនាំដោយ Robin Campillo និងសម្ដែងដោយ Nahuel Pérez Biscayart, Arnaud Valois, Adèle Haenel។ ខ្លីៗ គិតថារឿងនេះ ក៏នឹងក្លាយជាបេក្ខភាពដ៏ខ្លាំងមួយ ដោយសារវាបានឈ្នះពានដល់ទៅ ៤ ក្នុងមហោស្រពភាពយន្តទីក្រុងកាន ដែលរួមមានទាំងពាន Grand Prix ផងដែរ (ពានធំលំដាប់ទី២ បន្ទាប់ពី Palme d'Or ក្នុងមហោស្រពទីក្រុងកាន)។

ភាពយន្តគួរឲ្យចាប់អារម្មណ៍មួយចំនួនទៀត រួមមានដូចជា រឿង "The Insult” និយាយភាសាលីបង់, “A Fantastic Woman” (ភាសាស៊ីលី), “Loveless” (ភាសារុស្ស៊ី), “Foxtrot” (ភាសាអ៊ីស្រាអែល), “Happy End” (ភាសាអូទ្រីស) និងរឿង “Thelma” (ភាសាន័រវែស) ជាដើម៕

ទស្សនាសកម្មភាពក្រៅឆាក នៃការថតខ្សែភាពយន្ត "មុនដំបូងខ្មែរក្រហមសម្លាប់ប៉ារបស់ខ្ញុំ" ដូចខាងក្រោម៖