ការប្រកួត២នៅជម្រុះ AFC Asian Cup និង AFC U16 ស្ថិតក្នុងបញ្ជីពិន័យរបស់ AFC

2017-09-25 10:26:04
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

គណៈកម្មាធិការវិន័យ និងសីលធម៌របស់សហព័ន្ធកីឡាបាល់ទាត់ទ្វីបអាស៊ី (AFC) បានចេញសេចក្ដីសម្រេចរបស់ខ្លួន កាលពីថ្ងៃទី២១ ខែកញ្ញា ឆ្នាំ២០១៧ ដោយដាក់ពិន័យជាការព្យួរមិនឲ្យលេង និងជាទឹកប្រាក់ចំពោះកីឡាករជម្រើសជាតិ ២រូបរបស់ប្រទេសលីបង់ និងឆាយនីសតៃប៉ិ ព្រមទាំងកីឡាករ និងក្លឹប ក្នុងតំបន់អាស៊ី សម្រាប់ព្រឹត្តិការណ៍បាល់ទាត់របស់ខ្លួន។

នៅព្រឹត្តិការណ៍ជម្រុះពានរង្វាន់ AFC Asian Cup ២2019 ក្នុងជំនួបរវាងកូរ៉េខាងជើង ជាមួយលីបង់ កាលពីថ្ងៃទី៥ ខែកញ្ញា ឆ្នាំ២០១៧ កីឡាករ Maher Sabra របស់ក្រុមលីបង់ ត្រូវបានពិន័យ ព្យួរមិនឲ្យលេង ១ប្រកួត និងជាប្រាក់ចំនួន ៧៥០ដុល្លារ បន្ទាប់ពីត្រូវអាជ្ញាកណ្ដាលបណ្ដេញចេញពីទីលាន ដោយសារទាត់បាល់ពេញទំហឹងចំក្មេងរើសបាល់។

កូរ៉េខាងជើង (ស) Vs លីបង់ (ក្រហម)

ចំណែក ព្រឹត្តិការណ៍ជម្រុះ AFC U16 Championship 2018 វិញ ក្នុងជំនួបរវាងក្រុមឆានីសតៃប៉ិ ជាមួយ ហុងកុង កាលពីថ្ងៃទី១៦កញ្ញា កីឡាករ Lu Cheng-En របស់ឆាយនីសតៃប៉ិ ត្រូវបានពិន័យ មិនឲ្យលេង ១ប្រកួត និងជាប្រាក់ចំនួន ៣០០ដុល្លារ បន្ទាប់ពីត្រូវបណ្ដេញចេញ ដោយការទាត់ជើងគូប្រកួតដោយចេតនា។

កីឡាករ U16 ឆាយនីសតៃប៉ិ

ដោយឡែក ក្នុងការប្រកួតពានរង្វាន់ AFC Champions League សហព័ន្ធកីឡាបាល់ទាត់ទ្វីបអាស៊ី បានពិន័យលើកីឡាករ Kamaleddin Kamyabinia របស់ក្រុម Persepolis មកពីអ៊ីរ៉ង់ មិនឲ្យលេង ១ប្រកួត និងជាប្រាក់ ៣០០០ដុល្លារ ដោយសារទាត់លើគូប្រកួតរបស់ក្រុម Al Ahli ពេញទំហឹង មុនទទួលកាតក្រហម។ រីឯព្រឹត្តិការណ៍ AFC Cup 2017 ក្រុម Ceres Negros មកពីហ្វីលីពីន ត្រូវពិន័យចំនួន ២ករណីដោយពាក់ព័ន្ធនឹងការបញ្ជូនឯកសារ ក្នុងការប្រកួតចំនួនពីរផ្សេងៗគ្នា។ យ៉ាងណាមិញ សហព័ន្ធគ្រាន់តែព្រមានចំពោះ Ceres Negros តែប៉ុណ្ណោះ៕

ប្រភព៖ AFC ប្រែសម្រួល៖ លាភ.