Champions League អាស៊ី ប្រកួតវគ្គពាក់កណ្ដាលផ្ដាច់ព្រ័ត្រម៉ោង ៧យប់នេះ
- 2017-09-27 05:04:19
- ចំនួនមតិ 0 | ចំនួនចែករំលែក 0
Champions League អាស៊ី ប្រកួតវគ្គពាក់កណ្ដាលផ្ដាច់ព្រ័ត្រម៉ោង ៧យប់នេះ
ចន្លោះមិនឃើញ
ក្រុមអ្នកមានចិន Shanghai SIPG នឹងបើកទ្វារកីឡដ្ឋានសៀងហៃរបស់ខ្លួន ស្វាគមន៍ក្រុមជើងខ្លាំងជប៉ុន Urawa Red Diamonds ម៉ោង ៧យប់នេះ ក្នុងជើងទី១ វគ្គពាក់កណ្ដាលផ្ដាច់ព្រ័ត្រ AFC Champions League។ កាលពីជួបគ្នាក្នុងពូល ក្រុមទាំង២ ឈ្នះគ្នានៅទឹកដីរៀងខ្លួន គឺ Shanghai SIPG ឈ្នះ ៣-២ នៅទឹកដីខ្លួនឯង តែចាញ់ ១-០ វិញ នៅទឹកដី Urawa Red។
ព័ត៌មានកីឡាករ៖
ក្រុមម្ចាស់ផ្ទះ Shanghai SIPG នឹងត្រូវអវត្តមានកីឡាករសំខាន់ ៣នាក់ ដោយសារជាប់បម្រាម គឺប្រធានក្រុម Wang Shenchao អ្នកចាំទីដៃទី១ Yan Junling និងខ្សែបម្រើ Wang Jiajie។
ចំណែកក្រុមភ្ញៀវ Urawa Red វិញ ទំនងជាអវត្តមានខ្សែប្រយុទ្ធប្រេស៊ីល Rafael Silva និងខ្សែប្រយុទ្ធកូនកាត់ជប៉ុន-កូរ៉េ Tadanari Lee ដោយសារមិនទាន់ជាពីរបួស ១០០%។
កីឡាករសំខាន់៖
Shanghai SIPG ដែលដឹកនាំដោយគ្រូបង្វឹកព័រទុយហ្គាល់ Andre Villas-Boas មានកីឡាករលេចធ្លោច្រើន ដូចជា Oscar, Elkeson ជាពិសេស គឺខ្សែប្រយុទ្ធប្រេស៊ីល Hulk។ កីឡាករវ័យ ៣១ឆ្នាំរូបនេះ គឺជាកីឡាករតែម្នាក់គត់ ដែលស៊ុតចូលគ្រប់ការប្រកួតទាំងអស់ដែលខ្លួនចូលលេង នៅ AFC Champions League រដូវកាលនេះ។
កីឡាករលេចធ្លោរបស់ Urawa Red រួមមាន ខ្សែបម្រើនាំលេង Yosuke Kashiwagi, ប្រធានក្រុម Yuki Abe, ខ្សែការពារ Tomoaki Makino និងជាពិសេស គឺខ្សែប្រយុទ្ធ Shinzo Koroki។
ទិន្នន័យប្រកួត៖
Shanghai SIPG កំពុងឈរលេខ ២ ក្នុងតារាងលីគកំពូលចិន។ ក្រុមនេះមិនដែលចាញ់នោះទេ ក្នុងការប្រកួតលើដីខ្លួនឯង នៅ AFC Champions League ដោយឈ្នះ ៩ប្រកួត និងស្មើ ១ប្រកួត និងជាពិសេសគឺក្រុមនេះ អាចស៊ុតចូលបាន ១៨គ្រាន់ ក្នុង ៥ប្រកួតចុងក្រោយនៅកីឡដ្ឋានសៀងហៃ (គិតជាមធ្យម ៣,៦គ្រាប់ក្នុង១ប្រកួត)។ ក្នុងជំ័យជម្នះ ៩ប្រកួតនោះ ក៏មានជ័យជម្នះលើក្រុម Urawa Red ៣-២ កាលពីជួបគ្នាក្នុងពូលផងដែរ (ខែមីនា ២០១៧)។
ចំណែក Urawa Red កំពុងយ៉ាប់យ៉ឺននៅលីគកំពូលជប៉ុន ដោយកំពុងឈរលេខ ៧ ក្នុង ២៧ប្រកួត។ ប៉ុន្តែនៅ AFC Champions League ក្រុមនេះ ជាក្រុមដែលស៊ុតចូលច្រើនជាងគេ (២៦គ្រាប់) លើសក្រុម Shanghai SIPG ១គ្រាប់។ យ៉ាងណាក្ដី ក្រុមនេះ មានកំណត់ត្រាមិនល្អនោះទេ សម្រាប់ការប្រកួតក្រៅដីនៅពានទ្វីបអាស៊ីរដូវកាលនេះ ដោយចាញ់ទាំងអស់ ក្នុង ៤ប្រកួតចុងក្រោយ។
វីដេអូនៃការប្រកួតទាំង២ ជើង កាលពីក្រុមទាំង ២ ជួបគ្នាក្នុងពូល៖