Iceland ក្លាយជាប្រទេសតូចជាងគេបំផុត ដែលជាប់ទៅលេង World Cup

2017-10-10 01:59:28
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លទ្ធផលឈ្នះកូសូវ៉ូ ២-០ កាលពីយប់មិញនេះ ធ្វើឲ្យអ៊ីស្លង់ (Iceland) បានជាប់ទៅលេងពានរង្វាន់បាល់ទាត់ពិភពលោក FIFA World Cup ជាលើកដំបូងក្នុងប្រវត្តិសាស្រ្ដបាល់ទាត់របស់ខ្លួន និងបានក្លាយជាប្រទេសតូចបំផុត ដែលអាចឡើងទៅលេងពានរង្វាន់បាល់ទាត់ធំបំផុតមួយនេះ។

៣ពិន្ទុបន្ថែមក្នុងថ្ងៃចុងក្រោយនៃវគ្គជម្រុះពូល I នេះ ធ្វើឲ្យអ៊ីស្លង់ មាន ២២ពិន្ទុ លើសក្រុមលេខ២ ក្រូអាត ចំនួន ២ពិន្ទុ។ ក្រូអាត នឹងត្រូវលេង Play-off ជាមួយក្រុមលេខ២ ក្នុងពូលផ្សេងទៀត ដើម្បីដណ្ដើមកៅអីទៅ World Cup។ ក្រុមផ្សេងទៀតក្នុងពូល I ដែលធ្លាក់ រួមមាន អ៊ុយក្រែន តួកគី ហ្វាំងឡង់ និងកូសូវ៉ូ។

Iceland ជាប្រទេសដែនកោះ នៅភាគខាងជើងនៃមហាសមុទ្រអាត្លង់ទិច ដែលមានផ្ទៃដី ១០៣ពាន់គីឡូម៉ែត្រការ៉េ និងមានប្រជាជន តែជាង ៣៣ម៉ឺននាក់ប៉ុណ្ណោះ។ បើនិយាយពីជម្រើសជាតិបាល់ទាត់វិញ ប្រទេសនេះ មិនធ្លាប់ស្គាល់ជាតិទៅលេង World Cup នោះទេពីមុនមក។ ប៉ុន្តែចាប់ពីឆ្នាំ២០១៦មក ក្រុមបាល់ទាត់ប្រទេសនេះ បានធ្វើឲ្យពិភពលោកភ្ញាក់ផ្អើល ដោយបានឡើងដល់វគ្គ ៨ក្រុមចុងក្រោយពានរង្វាន់ទ្វីបអឺរ៉ុប និងបានជាប់ទៅលេង World Cup ឆ្នាំ២០១៨ នាពេលនេះ។

គិតត្រឹមយប់មិញនេះ មានក្រុមចំនួន ១៧ហើយ ដែលជាប់ស្វ័យប្រវត្តិទៅកាន់ World Cup 2018។ ក្រុមទាំងនោះ រួមមាន៖ រុស្ស៊ី (ម្ចាស់ផ្ទះ) បែលហ្ស៊ិក អង់គ្លេស អាល្លឺម៉ង់ ប៉ូឡូញ ស៊ែប អេស្ប៉ាញ អ៊ីស្លង់ ប្រេស៊ីល កូស្ដារីកា ម៉ិកស៊ីកូ អ៊ីរ៉ង់ អារ៉ាប៊ីសាអូឌីត ជប៉ុន កូរ៉េខាងត្បូង អេហ្ស៊ីប និងនីហ្សេរីយ៉ា៕