នៅខ្វះ១០ម៉ឺនដុល្លារទៀតទើបចេតិយ លោក កែម ឡី ត្រូវសាងសង់រួចរាល់

2017-10-31 03:43:09
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

គិតមកទល់នឹងពេលនេះ ចេតិយរបស់លោក កែម ឡី សង់រួចរាល់ចំនួនប្រមាណ ៣០% ហើយ។ នេះជាការបញ្ជាក់របស់លោក កែម រិទ្ធិសិទ្ធ ប្អូនប្រុសបង្កើតរបស់លោក កែម ឡី កាលពីថ្ងៃទី៣០ ខែតុលា ឆ្នាំ២០១៧។

លោក កែម រិទ្ធិសិទ្ធ ប្រាប់ថា ចេតិយដែលសង់នេះត្រូវចំណាយទឹកប្រាក់រហូតដល់ ១៧ម៉ឺនដុល្លារ។ ប៉ុន្តែនៅពេលនេះគឺនៅខ្វះខាតថវិកាប្រមាណជា ១០ម៉ឺនដុល្លារទៀត ទើបចេតិយអាចបញ្ចប់ការសាងសង់។

កន្លងមកដោយសារតែមានការអំពាវនាវពីសំណាក់ក្រុមគ្រួសារលោក កែម ឡី ទាក់ទងនឹងការខ្វះខាតថវិកាក្នុងការកសាងចេតិយនេះ ក៏មានសប្បុរសជនទាំងក្នុង និងក្រៅប្រទេសបាននាំគ្នាបរិច្ចាគក្នុងការជួយកសាង។ ក្នុងនោះក៏មានសម្ដេចនាយករដ្ឋមន្ត្រី ហ៊ុន សែន ផងដែរ ដែលបានផ្ដល់ជូនថវិការហូតដល់ទៅ ៧ម៉ឺនដុល្លារ។

យោងតាមគណៈកម្មការសាងសង់ចេតិយលោក កែម ឡី ធ្លាប់បានឲ្យដឹងថា ចេតិយលោក កែម ឡី ត្រូវបានសិក្សាតាមរចនាបថបាពួន។ ចេតិយនេះ ត្រូវសង់នៅលើផ្នូរលោក កែម ឡី ក្នុងភូមិអង្គតាកុប ឃុំលាយបូរ ស្រុកត្រាំកក់ ខេត្តតាកែវ។ ប្លង់នៃគម្រោងសំណង់ចេតិយនេះចែកចេញជា ៣ផ្នែកគឺ ខឿន តួចេតិយ និងកំពូល។ ក្នុងនោះ ខឿន មានបង្គោលសីមាព័ទ្ធជុំវិញ ដែលមានរចនាបថប្រាសាទព្រះវិហារ ដោយមានរូបចម្លាក់សត្វតោ នៅឈរការពារទាំង៨ទិស។ រីឯតួប្រាង្គចេតិយ បែងចែកជា ៥ថ្នាក់ ហើយប្រាង្គផ្គុំគ្នា ក្លាយជាតួចេតិយមួយ ដែលនៅកំពូលប្រាង្គចេតិយមានរូបព្រហ្មមុខបួនតំណាងឲ្យព្រហ្មវិហារធម៌ទាំង៤ និងមានបណ្ដោយ៩ម៉ែត្រ ទទឹង៩ម៉ែត្រ កម្ពស់១៦ម៉ែត្រ៕

ប្រភព៖ Vayo Fm ប្រែសម្រួល៖ ឈាង.