សម្តេច​នាយក​រដ្ឋមន្រ្តី ហ៊ុន សែន បាន​បញ្ជាក់​ថា កម្ពុជា នឹង​នៅតែ​រៀបចំ​កីឡា​ស៊ីហ្គេម​ឆ្នាំ​២០២៣ ហើយ​សម្តេច​ផ្ទាល់​សង្ឃឹម​ថា នឹង​អាច​នៅ​កាន់​ភ្លើង​គប់​បើក​ព្រឹត្តិការណ៍​នេះ​បាន​ទៀតផង។ សម្តេច​លើកឡើង​ដូច្នេះ ក្នុង​ពិធី​សំណេះ​សំណាល​ជាមួយ​កម្មករ-កម្មការិនី ១៤០០០​នាក់ នៅ​តំបន់​ចំការ​ដូង ក្នុង​ខណ្ឌដង្កោ នាព្រឹក​ថ្ងៃទី៨​វិច្ឆិកា​នេះ។

ការថ្លែង​នេះ គឺ​ឆ្លើយតប​ទៅនឹង​ការ​ចុះផ្សាយ​របស់​សារព័ត៌មាន​ក្នុង​ស្រុក​ថា កម្ពុជា​បាន​ដកខ្លួន​ពី​គម្រោង​ធ្វើជា​ម្ចាស់ផ្ទះ​ព្រឹត្តិការណ៍​ស៊ីហ្គេម ២០២៣ ដោយសារ​បញ្ហា​ថវិកា។ ការ​ចុះផ្សាយ​ព័ត៌មាន​នេះ ត្រូវបាន​លោក វ៉ាត់ ចំរើន  អគ្គ​លេខាធិការ​នៃ​គណៈកម្មាធិការ​ជាតិ​អូឡាំពិក​កម្ពុជា អះអាង​ថា អាចជា​មាន​ការ​ភាន់ច្រឡំ និង​ដកស្រង់​ខុស​ពី​ប្រសាសន៍​របស់​សម្ដេច ហ៊ុន សែន ក្នុង​ពិធី​បញ្ចុះ​បឋម​​សិលា​ដើម្បី​កសាង​ស្ពាន​ឆ្លង​ទន្លេ​សាប កាល​ពី​ថ្ងៃ​ទី២៣ ខែ​តុលា ឆ្នាំ​២០១៧។

លោក វ៉ាត់ ចំរើន ក៏បាន​បញ្ជាក់​ផងដែរ​ថា ​កម្ពុជា​នឹង​ធ្វើ​ម្ចាស់​ផ្ទះ​ព្រឹត្តិការណ៍​កីឡា​ស៊ីហ្គេម នា​ឆ្នាំ​២០២៣ ដូច​ការ​គ្រោង​ទុក៕