វគ្គផ្តាច់ព្រ័ត្រ Champions League អាស៊ី ត្រៀមបង្កើតកំណត់ត្រាថ្មីមួយ

2017-11-23 06:30:38
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្លឹបបាល់ទាត់ Urawa Red Diamonds របស់ជប៉ុន នឹងទទួលស្វាគមន៍ក្លឹប Al Hilal របស់អារ៉ាប៊ីសាអ៊ូឌីត ក្នុងការប្រកួតជើងទីពីរ វគ្គផ្តាច់ព្រ័ត្រ ពានរង្វាន់ AFC Champions League 2017 នៅកីឡដ្ឋាន Saitama World Cup Stadium នាប្រទេសជប៉ុន នៅថ្ងៃទីសៅរ៍ ទី២៥ ខែវិច្ឆិកា ឆ្នាំ២០១៧ វេលាម៉ោង ៥:១៥ នាទីល្ងាច។

Al Hilal ប៉ះ Urawa Red Diamonds កាលពីជើងទី១ វគ្គផ្តាច់ព្រ័ត្រ AFC Champions League 2017

កាលពីជើងទីមួយ ក្រុមទាំងពីរបានបញ្ចប់ទៅត្រឹមលទ្ធផល ១-១ នៅទឹកដីរបស់ Al Hilal ដែលអាចបង្កឲ្យការប្រកួតជើងទីពីរ កាន់តែមានភាពស្វិតស្វាញបន្ថែមទៀត។ កាលពីជើងទីមួយនេះដែរ អ្នកទស្សនាចំនួន ៥៩១៣៦ នាក់ បានចូលរួមទស្សនាផ្ទាល់ ហើយសំបុត្រចូលទស្សនានៅកីឡដ្ឋាន Saitama World Cup Stadium ដែលអាចផ្ទុកបាន ៥៨០០០នាក់ ប្រមាណជាង ៩៥ភាគរយក៏បានលក់អស់ហើយដែរ។

ជារួម ចំនួនអ្នកទស្សនាវគ្គផ្តាច់ព្រ័ត្ររវាងក្រុម Urawa និង Al Hilal ទាំងពីរជើងនេះ នឹងអាចបង្កើតជាកំណត់ត្រាថ្មីមួយ ក្នុងប្រវត្តិសាស្ត្រការប្រកួត AFC Champions League ។

លោក Shaikh Salman Bin Ebrahim Al Khalifa ប្រធានសហព័ន្ធកីឡាបាល់ទាត់ទ្វីបអាស៊ី (AFC) បានអះអាងថា យ៉ាងហោចណាស់មានអ្នកទស្សនាផ្ទាល់ ១២ម៉ឺននាក់មើលការប្រកួតទាំងពីរជើងនេះ។

កំណត់ត្រាចាស់ បានកើតឡើងកាលពីឆ្នាំ២០១៣ នៅក្នុងវគ្គផ្តាច់ព្រ័ត្រ AFC Champions League រវាងក្លឹប Guangzhou Evergrande និង FC Seoul ដែលមានអ្នកចូលទស្សនាចំនួន ១១១៣៤៨ នាក់។ កំណត់ត្រានៃចំនួនការចូលទស្សនាច្រើនបំផុតក្នុង១ប្រកួត កើតឡើងកាលពីឆ្នាំ២០១៤ ក្នុងជំនួបរវាងក្រុម Al Hilal និង Western Sydney នៅវគ្គផ្តាច់ព្រ័ត្រដូចគ្នា។

AFC Champions League ឆ្នាំនេះ ដោយគិតក្នុងចំណោម ១៤០ប្រកួតកន្លងទៅ ទទួលបានអ្នកទស្សនាផ្ទាល់ចំនួន ១ ៩០៧ ៩២០ នាក់ ឬ គិតជាមធ្យម ១៣៦២៨ នាក់ ក្នុងមួយប្រកួត៕

ប្រភព៖ AFC ប្រែសម្រួល៖ លាភ.