ប្រធានព្រឹទ្ធសភារុស្ស៊ី នឹងមកទស្សនកិច្ចនៅកម្ពុជា នៅឆ្នាំក្រោយ

2017-11-26 08:12:35
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក Stepan Zhiryakov សមាជិកគណៈកម្មាធិការគោលនយោបាយកសិកម្ម និងអាហារ និងការគ្រប់គ្រងបរិស្ថាន នៃព្រឹទ្ធសភារុស្ស៊ី បានឲ្យដឹងថា លោកស្រីប្រធានព្រឹទ្ធសភារុស្ស៊ី Valentina Matviyenko គ្រោងនឹងអញ្ជើញមកបំពេញទស្សនកិច្ចនៅព្រះរាជាណាចក្រកម្ពុជានាខែមីនា ឬមេសា ឆ្នាំ២០១៨ខាងមុខនេះ។ លោកលើកឡើងដូច្នេះ ក្នុងជំនួបពិភាក្សាជាមួយ លោក ងួន ញិល អនុប្រធានទី២ នៃរដ្ឋសភាកម្ពុជា ក្នុងឱកាសចូលរួមមហាសន្និបាតលើកទី១០ នៃសភាតំបន់អាស៊ីនៅប្រទេសតួកគី កាលពីថ្ងៃទី២២ខែវិច្ឆិកា។

លោកស្រី Valentina Matviyenko ប្រធានព្រឹទ្ធសភានៃសហព័ន្ធរុស្ស៊ី

លោក Stepan Zhiryakov បានគូសបញ្ជាក់ថា ប្រទេសរុស្ស៊ី បាននឹងកំពុងខិតខំជំរុញពង្រឹងពង្រីកទំនាក់ទំនងពាណិជ្ជកម្មជាមួយកម្ពុជា ដោយបានជំរុញដល់អ្នកវិនិយោគទុនរុស្ស៊ី មកកម្ពុជាឲ្យបានច្រើន។ លោកបន្តថា រដ្ឋាភិបាលកម្ពុជា និងរុស្ស៊ី បានចុះកិច្ចព្រមព្រៀងជាមួយគ្នាចំនួនជាង ២០គម្រោង ក្នុងនោះមានការបង្កើតឲ្យមានជើងហោះហើរត្រង់រវាងប្រទេសទំាង២។ បង្កើតរោងចក្រអគ្គិសនីប្រើដោយថាមពលនុយក្លេអ៊ែរ។ សាងសង់រោងម៉ាស៊ីនកិនស្រូវ និងការនាំចូលម្រេច កាហ្វេ ពីកម្ពុជាទៅរុស្ស៊ីជាដើម។

លោក ងួន ញិល ក្នុងជំនួបពិភាក្សាជាមួយលោក Stepan Zhiryakov។ រូបថត៖ រដ្ឋសភា

លោកបន្ថែមថា នៅពេលណាដែលគម្រោងសាងសង់រោងចក្រអគ្គិសនីចាប់ផ្តើមភ្លាម ពេលនោះការហោះហើរត្រង់រវាងប្រទេសទំាង២ ក៏នឹងចាប់ផ្តើមដែរ។ ការហោះហើរត្រង់នេះ នឹងជួយបង្កើនបន្ថែមចំនួនអ្នកទេសចរ និងអ្នកវិនិយោគរុស្ស៊ីមកកម្ពុជាយ៉ាងពិតប្រាកដ៕

អត្ថបទ៖ សំភី