កម្ពុជានាំចេញស្បែកជ្រូកទៅលក់នៅទីផ្សារធំៗក្នុងពិភពលោកជាលើកដំបូង

2017-11-30 03:39:07
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមហ៊ុន ម៉ុង ឫទ្ធី ជាក្រុមហ៊ុនក្នុងស្រុកដំបូងដែលនឹងនាំចេញស្បែកជ្រូកទៅកាន់ទីផ្សារអឺរ៉ុប ខណៈទីផ្សារធំបន្ទាប់គឺប្រទេសចិន។ លោក ម៉ុង ចាន់ថុល ជាកូនប្រុសលោកឧកញ៉ា ម៉ុង ឫទ្ធី បានប្រាប់ឲ្យដឹងថា រោងចក្រនេះជាការវិនិយោគរួមជាមួយក្រុមហ៊ុនចិន ក្រោមទំហំទឹកប្រាក់ប្រមាណជាង ៥លានដុល្លារ។

លោក ម៉ុង ចាន់ថុល បញ្ជាក់ថា នេះជាលើកដំបូងដែលកម្ពុជានាំចេញស្បែកជ្រូកទៅលក់នៅក្រៅប្រទេស ហើយទទួលបានសុទ្ធតែទីផ្សារធំៗ ដូចជាអឺរ៉ុប និងចិនជាដើម។

លោកបន្តថា សម្រាប់ជើងដំបូងនេះ ក្រុមហ៊ុនគ្រោងនឹងនាំចេញឲ្យបាន ៤០តោន ដោយទទួលបានតម្លៃដូចដូចតម្លៃទីផ្សារពិភពលោកដែរ។

លោក ម៉ុង ចាន់ថុល បន្ថែមទៀតថា រោងចក្រចម្រាញ់ស្បែកជ្រូកមួយនេះ មានសមត្ថភាពផលិតបានចំនួន ១ពាន់បន្ទះជារៀងរាល់ថ្ងៃ ហើយស្បែកជ្រូកនេះអាចយកទៅកែច្នៃជាស្បែកជើង ស្បែកពូករថយន្ត កាបូប និងខ្សែក្រវ៉ាត់ ជាដើម។ បច្ចុប្បន្នក្រុមហ៊ុន កំពុងបង្វឹកបុគ្គលិកបន្ថែមដើម្បីបង្កើនការផលិតស្បែកជ្រូក។

គួរជម្រាបថា រោងចក្រចម្រាញ់ស្បែកជ្រូកនេះ មានទីតាំងស្ថិតនៅក្នុងកំពង់ផែកែវផុស របស់លោក ម៉ុង ឫទ្ធី ស្ថិតក្នុងខេត្តព្រះសីហនុ ហើយនឹងត្រូវសាងសង់ឡើងលើផ្ទៃដីសរុប៦,៦ ហិកតា ៕

សូមទស្សនាវីដេអូនៃរោងចក្រផលិតស្បែកជ្រូកខាងក្រោម៖

អត្ថបទ៖ ស៊ិន សាវ៉េត