រកឃើញជើងឯកលីគនានា នៅជប៉ុនហើយ ខណៈ Fujieda គាំងនៅលីគ៣ដដែល

2017-12-04 07:45:30
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

មកទល់ពេលនេះ លីគកំពូល លីគលំដាប់ទី២ និងលីគលំដាប់ទី៣ ជប៉ុន បានរកឃើញម្ចាស់ជើងឯករៀងៗខ្លួនហើយ ហើយក្រុមខ្លះបានឡើងទៅលីគខ្ពស់មួយថ្នាក់ ចំណែកខ្លះទៀតធ្លាក់ទៅលីគទាបផងដែរ។

កាលពីថ្ងៃសៅរ៍ សប្ដាហ៍កន្លងទៅ បន្ទាប់ពីបំបាក់ក្រុម Omiya Ardija ដោយលទ្ធផល ៥-០ នៅក្នុងការប្រកួតសប្ដាហ៍ចុងក្រោយ ក្រុម Kawasaki Frontale បានគ្រងជើងឯកលីគកំពូលជប៉ុន J1 League រដូវកាល២០១៧ ដោយមានភាពប្រកៀកប្រកិត ជាមួយក្រុម Kashima Antlers មាន ៧២ពិន្ទុ ស្មើគ្នា តែ Kawasaki Frontale មានគ្រាប់បាល់ចំណេញច្រើនជាងរហូតដល់ ១៧គ្រាប់ឯណោះ។

ក្រុម Kawasaki Frontale លើកពានរង្វាន់លីគកំពូលជប៉ុន រដូវកាល ២០១៧

Kashima Antlers ស្ទើរតែក្លាយជាជើងឯករដូវកាល ២០១៧ ទៅហើយ តែប្រកួតចុងក្រោយ បានធ្វើឲ្យថ្លោះធ្លោយ បណ្ដាលឲ្យប្រកួតស្មើក្រុម Jubilo Iwata ខាតអស់ ២ពិន្ទុ។

ក្រុមដែលធ្លាក់ទៅលីគទី២ មាន Kofu, Albirex Niigata និង Omiya Ardija ។

ចំណែក លីគលំដាប់ទី២ ជប៉ុន ក៏រកឃើញជើងឯកផងដែរ គឺក្រុម Shonan Bellmare ដោយមាន ៨៣ពិន្ទុ ក្នុង ៤២ប្រកួត។ ២ក្រុមទៀតដែលត្រូវឡើងទៅលីគកំពូល មាន V-Varen Nagasaki និង Nagoya ។ សូមបញ្ជាក់ថា Nagoya បានឈ្នះក្នុងវគ្គ Play-off ដោយប្រកួតខ្វែងពីលេខ៣ ដល់លេខ៦ ។

ក្រុម Shonan Bellmare លើកពានរង្វាន់លីគទី២ ជប៉ុន

ក្រុមដែលធ្លាក់ទៅលីគទី៣ មាន Kumamoto និង Kusatsu ។

ដោយឡែក លីគលំដាប់ទី៣ វិញ ជើងឯកបានទៅលើក្រុម Blaublitz Akita ដោយមាន ៦១ពិន្ទុ នាំមុខក្រុមលេខ២ Tochigi SC ១ពិន្ទុ និងត្រូវដឹកដៃគ្នាឡើងទៅលីគលំដាប់ទី២ ជាមួយគ្នា។

អ្នកគាំទ្រ Blaublitz Akita

ទន្ទឹមនេះ ក្រុមដែលខ្សែប្រយុទ្ធកម្ពុជា ចាន់ វឌ្ឍនាកា នឹងត្រូវផុតកុងត្រានៅខែធ្នូនេះ Fujieda MYFC បានបញ្ចប់ទៅត្រឹមចំណាត់ថ្នាក់លេខ៧ ប៉ុណ្ណោះ ដោយមាន ៤៧ពិន្ទុ ដូច្នេះមិនអាចឡើងទៅលីគទី២ បានឡើយ៕