ហេតុអ្វីការនាំយកកីឡាករល្បីៗរបស់កម្ពុជា ជារឿងល្អសម្រាប់លីគកំពូលម៉ាឡេស៊ី?

2017-12-14 06:56:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

មួយរយៈចុងក្រោយនេះ ក្លឹបក្នុងលីគកំពូលម៉ាឡេស៊ី បានបង្វែរចំណាប់អារម្មណ៍របស់ខ្លួនមកលើតារាបាល់ទាត់កម្ពុជា។ ក្នុងនោះ ខ្សែប្រយុទ្ធ កែវ សុខផេង និង ធារី ចន្ថាប៊ីន ត្រូវបានក្លឹបចំនួនពីរផ្សេងគ្នា ចុះកុងត្រាយកទៅចូលរួមជាមួយពួកគេ ដើម្បីប្រកួតប្រជែងនារដូវកាលថ្មី នាដើមឆ្នាំ២០១៨ ខាងមុខ។ ជាមួយគ្នានេះ ខ្សែប្រយុទ្ធ ចាន់ វឌ្ឍនាកា ដែលទើបផុតកុងត្រាជាមួយក្លឹបនៅលីគទី៣ ជប៉ុន ក៏ត្រូវបានរាយការណ៍ថា គ្រោងនឹងផ្លាស់ទៅកាន់ក្លឹបមួយនៅប្រទេសម៉ាឡេស៊ីផងដែរ។

តើការចុះកុងត្រាយកកីឡាករកម្ពុជា មានផលល្អអ្វីខ្លះ ដល់លីគកំពូលម៉ាឡេស៊ី? ខ្លីៗ សូមលើកយក ៣ចំណុច ដែលមានដូចខាងក្រោម៖

១. លីគម៉ាឡេស៊ី នឹងកើនប្រជាប្រិយភាពនៅកម្ពុជា

ក្លឹបម៉ាឡេស៊ី ច្បាស់ជាបានដឹងពីចំនួនអ្នកគាំទ្របាល់ទាត់ ដ៏ច្រើនសន្ធឹកសន្ធាប់នៅកម្ពុជា ដូច្នេះការនាំយកកីឡាករជម្រើសជាតិកម្ពុជាខាងលើ អាចជាការទាក់ទាញអ្នកគាំទ្រពីប្រទេសកម្ពុជា ឲ្យបានស្គាល់ និងងាកទៅចាប់អារម្មណ៍លីគកំពូលម៉ាឡេស៊ី។ ជាក់ស្ដែង កាលពីដើមឆ្នាំ២០១៧ លីគលំដាប់ទី៣ ជប៉ុន ដែលអ្នកគាំទ្រកម្ពុជា មិនដែលចាប់អារម្មណ៍ចង់ដឹងនោះ ប្រែក្លាយជាចំណាប់អារម្មណ៍ថ្មីសម្រាប់អ្នកតាមដានបាល់ទាត់នៅកម្ពុជា ក្រោយពី ចាន់ វឌ្ឍនាកា ផ្លាស់ទៅក្លឹប Fujieda MYFC។ អ្នកគាំទ្រកម្ពុជាជាច្រើនម៉ឺននាក់ បានចុច Like ទំព័រហ្វេសប៊ុករបស់ក្លឹបនេះ ហើយថែមទាំងមានការតាមដានលទ្ធផល តាមដានកម្មវិធីប្រកួត រហូតដល់មានការផ្សាយបន្តផ្ទាល់ការប្រកួតតាមទូរទស្សន៍ថែមទៀតផង។

២. សន្ទុះទឹកចិត្ត របស់កីឡាករកម្ពុជា ពេលទៅលេងនៅក្រៅប្រទេស

ការផ្លាស់ទៅលេងនៅលីគក្រៅប្រទេស ជាក្ដីប្រាថ្នារបស់កីឡាករកម្ពុជាជាច្រើនរូប ដែលរួមមានទាំងតារាល្បី កែវ សុខផេង និង ចាន់ វឌ្ឍនាកា ផងដែរ។ ពួកគេ សុទ្ធតែធ្លាប់និយាយថា មានបំណងទៅលេងនៅលីគក្រៅប្រទេស ដើម្បីដកស្រង់បទពិសោធន៍សម្រាប់ការអភិវឌ្ឍខ្លួន និងវិស័យបាល់ទាត់ក្នុងប្រទេស។ នៅពេលសម្រេចបំណង ច្បាស់ណាស់ពួកគេ នឹងព្យាយាមអស់ពីចិត្តពីថ្លើម ដើម្បីបង្ហាញស្នាដៃជូនអ្នកគាំទ្រក្លឹបនៅក្រៅប្រទេស និងអ្នកគាំទ្រក្នុងប្រទេស ដែលនឹងតាមដានការប្រកួតរបស់ពួកគេ។

កម្លាំងទឹកចិត្ត ឆន្ទៈ ការប្ដេជ្ញា រួមទាំងគុណភាពនៃកីឡាករកំពូលៗរបស់កម្ពុជា នឹងរួមចំណែកជួយឲ្យក្លឹបម៉ាឡេស៊ីទាំងនោះ ទទួលបានលទ្ធផលគាប់ប្រសើរ។

៣. កម្ពុជា និងម៉ាឡេស៊ី មានកម្រិតបាល់ទាត់ប្រហាក់ប្រហែលគ្នា

បើគិតលើចំណាត់ថ្នាក់ FIFA Ranking នាពេលបច្ចុប្បន្ន ក្រុមជម្រើសជាតិកម្ពុជា និងជម្រើសជាតិម៉ាឡេស៊ី ស្ថិតនៅលេខរៀងប្រដំប្រសងគ្នា ពោលគឺកម្ពុជា ស្ថិតនៅលេខ១៧០ ឯ ម៉ាឡេស៊ី នៅលេខ ១៧៤។ ដូច្នេះ កម្រិតរបស់កីឡាករ ក៏អាចមានការប្រហាក់ប្រហែលគ្នាផងដែរ។ ហេតុនេះ វាជាការប្រសើរមួយសម្រាប់ក្លឹបម៉ាឡេស៊ី ក្នុងការផ្ដល់តម្លៃប្រាក់ឈ្នួលសមរម្យសម្រាប់ពួកគេ ជាជាងនាំយកកីឡាករប្រទេសដែលមានកម្រិតបាល់ទាត់ខ្ពស់ ដូចជា កីឡាករមកពីលីគកំពូលថៃ និងវៀតណាម ព្រោះពួកគេអាចទាមទារប្រាក់ឈ្នួលថ្លៃ៕

អត្ថបទពាក់ព័ន្ធ