ឪពុក ចាន់ វឌ្ឍនាកា នៅតែចង់ឲ្យកូនលេងនៅក្រៅប្រទេស
- 2017-11-20 13:34:43
- ចំនួនមតិ 0 | ចំនួនចែករំលែក 0
ឪពុក ចាន់ វឌ្ឍនាកា នៅតែចង់ឲ្យកូនលេងនៅក្រៅប្រទេស
ចន្លោះមិនឃើញ
លោក ចាន់ ចេស្តា អភិបាលខេត្តកំពត និងជាឪពុករបស់កីឡាករ ចាន់ វឌ្ឍនាកា បាននិយាយថា ការទទួលបានឱកាសទៅលេងក្រៅប្រទេស គឺជាឱកាសល្អមួយសម្រាប់វឌ្ឍនាកាដើម្បីអភិវឌ្ឍខ្លួន ការបង្កើនសមត្ថភាព និងបទពិសោធ។ លោកលើកឡើងដូច្នេះ ក្នុងពិធីបើកការប្រកួតលីគបាល់ទាត់យុវជនក្រោមអាយុ១៤ឆ្នាំ និង១៦ឆ្នាំ ព្រមទាំងជើងឯកនារីនៅទីរួមខេត្តកំពត កាលពីថ្ងៃទី១៩វិច្ឆិកា។
ចាន់ វឌ្ឍនាកា នឹងផុតកុងត្រាខ្ចីជើងពីក្លឹប Fujieda MYFC នាដើមខែធ្នូ ឆ្នាំ២០១៧ ខាងមុខនេះ ទាំងរូបគេបានបង្ហាញខ្លួនផ្លូវការឲ្យក្លឹបជប៉ុននេះ ២ប្រកួតប៉ុណ្ណោះ ហើយរូបគេ នឹងត្រឡប់មកទឹកដីកំណើតវិញ។ លោក ចាន់ ចេស្តា មិនទាន់ដឹងច្បាស់ថា កូនប្រុសរបស់លោក នឹងទៅលេងក្លឹបណានោះទេ។ តែទោះជាយ៉ាងណាលោកថា ការទៅលេងនៅក្រៅប្រទេស ជាផ្នែកមួយដ៏សំខាន់ជួយដល់ជម្រើសជាតិ និងក៏អាចចែករំលែកបទពិសោធន៍ និងចំណេះដឹងដល់យុវជនជំនាន់ក្រោយផងដែរ។ វឌ្ឍនាកា គឺជាយុវជនរបស់ជាតិ មិនមែនសម្រាប់តែគ្រួសាររបស់លោកនោះទេ។
លោក ចាន់ ចេស្តា ក៏បានឲ្យដឹងដែរថា សម្រាប់ការទៅលេងក្លឹបជប៉ុនរបស់ CV11 គឺទទួលបានការអនុញ្ញាតពីសម្តេចនាយករដ្ឋមន្រ្តី ហ៊ុន សែន លោក សៅ សុខា ប្រធានសហព័ន្ធកីឡាបាល់ទាត់កម្ពុជា ព្រមទាំងក្រុមគ្រួសាររបស់លោក ក៏ដូចជាអ្នកគាំទ្រផងដែរ៕