វឌ្ឍនាកា មិនអាក់អន់ចិត្តចំពោះក្លឹប Fujieda ឡើយ
- 2017-12-08 04:07:55
- ចំនួនមតិ 0 | ចំនួនចែករំលែក 0
វឌ្ឍនាកា មិនអាក់អន់ចិត្តចំពោះក្លឹប Fujieda ឡើយ
ចន្លោះមិនឃើញ
ខ្សែប្រយុទ្ធក្រុមជម្រើសជាតិកម្ពុជា ចាន់ វឌ្ឍនាកា បានបញ្ជាក់ថា រូបគេមិនអាក់អន់ចិត្តចំពោះក្លឹប Fujieda ឡើយ ទោះមិនបានលេងក៏ដោយ។
CV11 បានបញ្ចប់កុងត្រាខ្ចីជើងជាមួយក្លឹបលីគទី៣ជប៉ុន Fujieda ហើយ ក្នុងនោះរូបគេ បានបង្ហាញខ្លួនឲ្យក្លឹបនេះ តែ២ប្រកួត និងលេងបានតែប៉ុន្មាននាទីប៉ុណ្ណោះ ក្នុង១រដូវកាលឆ្នាំ២០១៧នេះ។ ប៉ុន្តែកីឡាកររូបនេះ នៅតែបង្ហាញពីភាពរីករាយដែលបានទៅលេងនៅជប៉ុន។
ពេលមកដល់កម្ពុជាវិញ កាលពីម្សិលមិញនេះ វឌ្ឍនាកា បានឲ្យដឹងយ៉ាងដូច្នេះថា៖ «សម្រាប់ខ្ញុំ ទោះជាមិនបានលេង ក៏ជាការសម្រេចចិត្តដ៏ត្រឹមត្រូវមួយ ព្រោះអីប្រទេសគេមានបាល់ទាត់រីកចម្រើន។ ឧទាហរណ៍ថា បើរៀន រៀនជាមួយអ្នកពូកែ យើងក៏នឹងពូកែតាមដែរ។ គ្រាន់តែថា មានកម្រិតពូកែខ្លាំង ពូកែតិចប៉ុណ្ណឹងទេ។ សម្រាប់ខ្ញុំអត់អន់ចិត្តអ្វីទេដែលមិនបានលេង។ ផ្ទុយទៅវិញ ខ្ញុំកាន់តែសប្បាយចិត្តដែលបានទៅលេងនៅជប៉ុន រៀនសូត្រពីគេ និងអភិវឌ្ឍខ្លួនឯងកាន់តែប្រសើរ»។
វឌ្ឍនាកាបានប្រៀបធៀបសមត្ថភាពរបស់ខ្លួន និងសមត្ថភាពរបស់ខ្សែប្រយុទ្ធក្រុម Fujieda MYFC គឺខុសគ្នាត្រង់ទម្លាប់លេង។ រូបគេធ្លាប់លេងរបៀបនៅកម្ពុជា ដល់ពេលទៅលេងនៅជប៉ុន រូបគេត្រូវផ្លាស់ប្តូរតាមទម្លាប់របៀបលេងរបស់ជប៉ុន ដូច្នេះហើយទើបជួបការលំបាកខ្លាំង។ ជាពិសេសបញ្ហាភាសាដែលធ្វើឲ្យរូបគេពិបាកក្នុងការទំនាក់ទំនងពេលលេងលើទីលាន៕