ខណ្ឌសែនសុខ ជាតំបន់ស្រូបទាញគម្រោងវិនិយោគ ច្រើនជាងគេនៅភ្នំពេញ
- 2018-01-16 10:06:37
- ចំនួនមតិ 0 | ចំនួនចែករំលែក 0
ខណ្ឌសែនសុខ ជាតំបន់ស្រូបទាញគម្រោងវិនិយោគ ច្រើនជាងគេនៅភ្នំពេញ
ចន្លោះមិនឃើញ
ខណ្ឌសែនសុខ ដែលស្ថិតនៅប៉ែកខាងត្បូងនៃរាជធានីភ្នំពេញ បាននឹងកំពុងអន្ទងចិត្តវិនិយោគិន ក្រោយមានគម្រោងអភិវឌ្ឍន៍គ្រាក់ៗ កំពុងលេចរូបរាងជាបណ្តើរៗ។ គម្រោងទាំងនោះ មានដូចជា ផ្សារទំនើបអ៊ីអនម៉លទី២ ផ្សារបោះដុំ និងលក់រាយ (ផ្សារម៉ាក្រូ) គម្រោងសាងសង់មជ្ឈមណ្ឌលសន្និបាត និងពិព័រណ៍សែនសុខ និងគម្រោងប្រភេទផ្ទះអាជីវកម្ម (Shop House) ដែលមានតម្លៃខ្ទង់សែនដុល្លារក្នុងមួយល្វែងជាដើម។
វត្តមាននៃគម្រោងធំៗទាំងនេះ បានបង្កើនវិសាលភាពនៃសក្តានុពលទីផ្សារអលនទ្រព្យនៅក្នុងខណ្ឌសែនសុខ ឲ្យកាន់តែលេចធ្លោឡើង ស្របពេលដែលអ្នកជំនាញបង្ហាញសុទ្ធិដ្ឋិនិយមថា តំបន់នេះកំពុងធ្វើដំណើរលឿនជាងគេក្នុងការអភិវឌ្ឍ។
លោក ពីង សេរី នាយកគ្រប់គ្រងទូទៅនៃក្រុមហ៊ុន Cambodia Angkor Real Estate បានថ្លែងប្រាប់ខ្លីៗឲ្យដឹងថា ការអភិវឌ្ឍតំបន់សែនសុខមិនមែនជាជំហានគីង្គក់ទៀតនោះទេ ពោលគឺតំបន់នេះកំពុងវ៉ាដាច់គេក្នុងការអភិវឌ្ឍលើវិស័យអចលនទ្រព្យនៅរាជធានីភ្នំពេញ។
លោកបានលើកជាទឡ្ហីករណ៍ថា គម្រោងផ្សារអន្តរជាតិ និងមន្ទីរកសិកម្មជាដើម និងគម្រោងផ្សេងៗជាច្រើនទៀតងាកទៅតំបន់សែនសុខ។ ការណ៍នេះ បានធ្វើឲ្យផ្ទះមានតម្លៃចាប់ពី ១២ម៉ឺនដុល្លារ រហូតដល់ ៣០ម៉ឺនដុល្លារ។
កាលពីពេលថ្មីៗនេះ នៅក្នុងពិធីបើកសម្ពោធការដ្ឋានសាងសង់គម្រោងផ្ទះអាជីវកម្មមួយ ស្ថិតនៅជាប់ផ្សារទំនើបអ៊ីអនម៉លទី២ លោក បណ្ឌិត អៀង អូននី អភិបាលរងរាជធានីភ្នំពេញ បានលើកឡើងថា តំបន់ភ្នំពេញថ្មីស្ថិតក្នុងខណ្ឌសែនសុខ បានបន្តវិវឌ្ឍខ្លួនយ៉ាងលឿន ក្លាយទៅជាតំបន់មានសក្តានុពលលើការអភិវឌ្ឍវិស័យអចលនទ្រព្យ។ លោកបានថ្លែងយ៉ាងដូច្នេះថា៖ «យើងមើលឃើញថា តំបន់នេះមានហេដ្ឋារចនាសម័ន្ធល្អដូចនៅក្នុងទីក្រុង ដែលវាជាកត្តាទាក់ទាញឲ្យមនុស្សទៅរស់នៅច្រើន និងប្រកបអាជីវកម្ម»៕