អ្នកជំនាញអចលទ្រព្យ ក្រើនរំលឹកដល់ពលរដ្ឋ នៅតំបន់គម្រោងសាងសង់ព្រលានយន្តហោះ

2018-01-22 06:48:22
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រោយរាជរដ្ឋាភិបាល បានប្រកាសពីគម្រោងសាងសង់ព្រលានយន្តហោះនៅក្រុងតាខ្មៅ និងស្រុកកណ្តាលស្ទឹង ខេត្តកណ្តាល បានធ្វើឲ្យតម្លៃដីនៅតំបន់នោះស្ទុះឡើងយ៉ាងគំហុក។ លោក គីម ហ៊ាង ប្រធានសមាគមអ្នកវាយតម្លៃអចលនទ្រព្យកម្ពុជា លើកឡើងថា អ្នកដែលទទួលផលប្រយោជន៍ខ្លាំង ពីគម្រោងនេះ គឺប្រជាជននៅតំបន់នោះតែម្ដង ប៉ុន្តែទន្ទឹមនឹងនេះ លោកក៏បានក្រើនរំលឹក និងផ្តល់អនុសាសន៍ដល់ពលរដ្ឋចំពោះការលក់ដីនោះផងដែរ។

ព្រលានយន្តហោះអន្តរជាតិភ្នំពេញ (រូបតំណាង)

ម្ចាស់ក្រុមហ៊ុន KHMER REAL ESTATE រូបនេះនិយាយថា ទម្លាប់ដដែលរបស់ប្រជាពលរដ្ឋខ្មែរភាគច្រើន នៅពេលដែលលក់ដីបាន គឺយកទៅធ្វើផ្ទះឲ្យធំ ទិញម៉ូតូឲ្យកូនក្មួយម្នាក់មួយ ទិញឡានទំនើបជិះ តែ៣ឆ្នាំក្រោយលក់ទាំងផ្ទះ លក់ទាំងឡាន ធ្វើឲ្យក្រលើសដើម។

តាមបទពិសោធន៍ជាង១០ឆ្នាំ លោកផ្ដល់ជាយោបល់ថា ប្រសិនបើលក់ដី២ហិចតា បាន១០ម៉ឺនដុល្លារ គួរយកលុយ ១/៤ ឫស្មើ ២៥ ០០០ដុល្លារទៅទិញដីឆ្ងាយពីតំបន់នោះប្រហែល ៥ ឫ១០គីឡូម៉ែត្រ ឲ្យបាន៤ហិចតា។ ដូចនេះលុយនៅសល់ ៧៥ ០០០ដុល្លារ ត្រូវគិតពីការរកស៊ីវិញ។

លោក គីម ហ៊ាង ប្រធានសមាគមអ្នកវាយតម្លៃ និងភ្នាក់ងារអចលនទ្រព្យកម្ពុជា

លោកបន្ថែមថា ប្រជាពលរដ្ឋភាគច្រើន ពេលលក់ដីបាន១០ម៉ឺនដុល្លារ សឹងតែយកទៅសង់ផ្ទះទាំងអស់តែម្ដងគ្មានទុកទេ ហើយក៏មិនគិតពីការរកស៊ីសោះដែរ។ ដូច្នេះវាអាចនឹងនាំហានិភ័យច្រើនដល់គ្រួសារ ព្រោះសង់ផ្ទះហើយ អស់លុយរលីងមានតែសំបកផ្ទះ គ្មានដើមទុនសូម្បីបន្តិចដើម្បីរកស៊ី។ លោកថា ទៅថ្ងៃមុខទោះចង់ឫមិនចង់ គឺប្រាកដជាលក់ផ្ទះនោះវិញមិនខាន។

លោក គីម ហ៊ាង ធ្លាប់បានបញ្ជាក់ប្រាប់សារព័ត៌មាន Fresh News ថា ដីនៅតំបន់គម្រោងសាងសង់ព្រលានយន្តហោះនោះ ពីមុនតម្លៃមួយម៉ែត្រការ៉េ មានចាប់ពី១ដុល្លារ ដល់៥ដុល្លារ ឬមួយហិកតា ១ម៉ឺនដុល្លារ ទៅ៥ម៉ឺនដុល្លារ ហើយបានឡើងថ្លៃដល់មួយម៉ែត្រការ៉េ ១០ដុល្លារ ទៅដល់៦០ដុល្លារ ក្រោយការប្រកាសគម្រោងនេះ៕

អត្ថបទ៖ ថោ ច័ន្ទឬទ្ធិ