វៀតណាមដាក់ដំណើរការរោងចក្រកែច្នៃផលិតផលជ័រកៅស៊ូធំជាងគេក្នុងតំបន់អាស៊ីអាគ្នេយ៍ នៅកម្ពុជា

2018-01-27 02:02:15
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

រោងចក្រកែច្នៃផលិតជ័រកៅស៊ូខ្នាតធំជាងគេមួយនៅក្នុងតំបន់អាស៊ីអាគ្នេយ៍របស់ក្រុមហ៊ុនវៀតណាម ស្ថិតនៅក្នុងឃុំពពក ស្រុកស្ទោង ខេត្តកំពង់ធំ បានបើកសម្ពោធដាក់ឲ្យប្រើប្រាស់ជាផ្លូវការកាលពីម្សិលមិញ។

រោងចក្រកែច្នៃកៅស៊ូស្ទោង ស៊ីអស៊ីខេ២ របស់ក្រុមហ៊ុនកៅស៊ូ ជីសេ ជាសម្ព័ន្ធឧស្សាហកម្មកៅស៊ូវៀតណាម (VRG) គ្រប់គ្រងដោយរដ្ឋនៃប្រទេសវៀតណាម ដែលផលិត និងនាំចេញកៅស៊ូច្រើនជាងគេក្នុងប្រទេសមួយនេះ។ រោងចក្រនេះ មានសមត្ថភាពផលិតជ័រកៅស៊ូកែច្នៃបានចំនួន ២១៥០០ តោនក្នុងមួយឆ្នាំ ហើយតួលេខនៃផលិតកម្មនេះនឹងកើនឡើងរហូតដល់ ៤៥០០០ តោននៅត្រឹមឆ្នាំ២០៣០។

ថ្លែងក្នុងពិធីសម្ពោធ ឧបនាយករដ្ឋមន្ត្រី យឹម ឆៃលី ប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ បានមានប្រសាសន៍ថា គោលដៅរបស់រាជរដ្ឋាភិបាលកម្ពុជា ត្រូវបង្កើនផ្ទៃដីដាំដុះ កៅស៊ូឲ្យបានច្រើន ដោយកំណត់បរិមាណផលិតផលឲ្យបាន ២៩ម៉ឺនតោន នៅឆ្នាំ២០២០ ខណៈកម្ពុជា ជាប្រទេសផលិតជ័រកៅស៊ូធម្មជាតិបានច្រើនម៉ឺនតោន ក្នុងមួយឆ្នាំៗ ស្ថិតក្នុងលំដាប់ថ្នាក់ទី១៦ ក្នុងចំណោមបណ្តាប្រទេសផលិតកៅស៊ូធម្មជាតិលើសកលលោក។

ទន្ទឹមនឹងនេះដែរ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ជំរុញឲ្យមានវិនិយោគិនពីប្រទេសវៀតណាមបន្ថែមទៀតលើការសាងសង់ហេដ្ឋារចនាសម្ព័ន្ធកែច្នៃផលិតផលវត្ថុធាតុដើមពីកសិកម្មប្រកបដោយគុណភាព និងសុវត្ថិភាពត្រូវនឹងតម្រូវការទីផ្សារក្នុងស្រុក និងធ្វើការនាំចេញ។

សារព័ត៌មានក្នុងស្រុករបស់ប្រទេសវៀតណាមមួយបានរាយការណ៍ថា រយៈពេលជាង១ទសវត្សរ៍មកនេះ សម្ព័ន្ធឧស្សាហកម្មកៅស៊ូវៀតណាមបានវិនិយោគដាំដំណាំកៅស៊ូលើទំហំផ្ទៃដីជិត ៩០០០០ ហិកតាក្នុងខេត្តចំនួន៨ នៅលើទឹកដីកម្ពុជា ដោយចំណាយទុនវិនិយោគប្រមាណជិត ៧០០ លានដុល្លារអាមេរិក។

គូរបញ្ជាក់ថា ក្នុងឆ្នាំ២០១៧កន្លងទៅនេះ សម្ព័ន្ធឧស្សាហកម្មកៅស៊ូវៀតណាម ប្រមូលផលកៅស៊ូបានជាង២៧៨ពាន់តោន កែច្នៃជ័រកៅស៊ូគ្រប់ប្រភេទបានជាង ៣៦៥ពាន់តោន។ VGR បានធ្វើការលក់ចេញបាន ៣៤៥ពាន់តោន និងរកបានចំណូលសរុបជាង ៣០៣លានដុល្លារអាមេរិក ខណៈនៅខែដើមខែកុម្ភៈ ឆ្នាំ២០១៨ ក្រុមអ្នកផលិត និងនាំចេញកៅស៊ូធំជាងគេមួយនេះ នឹងបើកយុទ្ធនាការ បោះផ្សាយលក់មូលបត្រជាសាធារណៈលើកដំបូង (IPO) ដើម្បីសម្រេចបាននូវមហិច្ឆតារបស់ខ្លួនក្នុងការបង្កើនប្រាក់ចំណូលឲ្យបាន ១៧៦ ពាន់ដុល្លារអាមេរិកក្នុងមួយឆ្នាំៗ។

អត្ថបទ៖ សិរីឧត្តម