ច្រកទ្វារអន្តរជាតិ ប៉ោយប៉ែត នឹងត្រូវសាងសង់ក្លោងទ្វារថ្មី

2018-02-05 03:17:08
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អភិបាលក្រុងប៉ោយប៉ែត លោក សាន ស៊ានហូ គ្រោងស្ទូចក្លោងទ្វារប្រាសាទកំពូល៣ ចេញពីព្រំដែន ខ្មែរ-ថៃ ដើម្បីស្ថាបនាច្រកទ្វារអន្តរជាតិថ្មីមួយដែលមានរចនាបថខ្មែរសុទ្ធសាធ។

លោក សាន ស៊ានហូ បានឲ្យដឹងថា គម្រោងស្ថាបនាច្រកទ្វារថ្មីនេះ សម្រេចប្រហែល ១០ភាគរយ ហើយនឹងធ្វើរួចរាល់ជាស្ថាពរ នៅឆ្នាំ២០១៩។

គម្រោងសាងសង់ អគារទីស្នាក់ការច្រកទ្វារអន្តរជាតិប៉ោយប៉ែត

សូមរំឭកថា កាលពីខែតុលា ឆ្នាំ២០១៧ ប្រជាពលរដ្ឋរស់នៅព្រំដែនកម្ពុជាថៃ ក្រុងប៉ោយប៉ែតខេត្តបន្ទាយមានជ័យ បានសម្ដែងការសោកស្ដាយ ក្រោយពីទទួលដំណឹងថា អាជ្ញាធរកម្ពុជា គ្រោងវាយកម្ទេចចោលក្លោងទ្វារចាស់។ ប៉ុន្តែ គម្រោងវាយកម្ទេចចោលនេះ បានជំនួសមកវិញ ដោយអាជ្ញាធរ នឹងស្ទូច ក្លោងទ្វារប្រាសាទនេះចេញ ទៅដាក់នៅក្នុងរង្វង់មូលប៉ោយប៉ែតវិញ។

អភិបាលក្រុង ឲ្យដឹងថា ក្លោងទ្វារច្រកព្រំដែនអន្តរជាតិប៉ោយប៉ែត កសាងនៅអំឡុងឆ្នាំ១៩៨០ មានកំពូល៣ កសាងក្នុងរចនាបថប្រាសាទអង្គរវត្ត។ មុននឹងសម្រេចស្ទូចចេញ អាជ្ញាធរនឹងធ្វើពិធីសែនព្រេន បួងសួង ដើម្បីសុំយកក្លោងទ្វារប្រាសាទកំពូល៣នេះ ចេញទៅដាក់ទីតាំងថ្មី ក្នុងរង្វង់មូលប៉ោយប៉ែត ដែលនៅប្រហែល១០០ម៉ែត្រ ពីច្រកទ្វារប៉ោយប៉ែត៕

ចុចអានបន្ត នគរបាលប៉ោយប៉ែត យកថ្លៃសំបុត្រចេញចូលច្រកព្រំដែនពីអាជីវករ និងអ្នកទិញឥវ៉ាន់

អត្ថបទ៖ លាភ.