ក្រសួងវប្បធម៌ ត្រៀមបញ្ចូលប្រាសាទ២ទៀត ជាបេតិកភណ្ឌពិភពលោក

2018-02-08 02:20:30
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងវប្បធម៌ និងវិចិត្រសិល្បៈ កំពុងរៀបចំឯកសារពាក់ព័ន្ធមួយចំនួន ស្នើទៅកាន់អង្គការយូណេស្កូ ដើម្បីបញ្ចូលប្រាសាទកោះកេរ និងប្រាសាទបន្ទាយឆ្មារ ចូលជាបេតិកភណ្ឌពិភពលោក នៅឆ្នាំ២០១៨នេះ។ នេះបើការបញ្ជាក់របស់រដ្ឋមន្ត្រីក្រសួងវប្បធម៌ លោកស្រី ភឿង សកុណា ដែលបានថ្លែងក្នុងសន្និបាតបូកសរុបលទ្ធផលការងារ កាលពីថ្ងៃទី៧ ខែកុម្ភៈ។

លោកស្រី ភឿង សកុណា ថ្លែងនាពេលកន្លងមក

លោកស្រី ភឿង សកុណា បន្តថា ក្រៅពីការស្នើដាក់ប្រាសាទកោះកេរ និងប្រាសាទបន្ទាយឆ្មារហើយ ក្រសួងក៏បានរៀបចំឯកសារល្ខោនខោល និងក្បាច់ល្បុក្កតោទៅកាន់អង្គការយូណេស្កូរួចជាស្រេចផងដែរ។ លោកស្រីរដ្ឋមន្រ្តី ឲ្យដឹងទៀតថា បន្ថែមពីនេះលោកស្រីក៏កំពុងតែរៀបចំខាងតម្បាញសូត្រ និងទាក់ទងទៅបណ្ដាប្រទេសនានា ដើម្បីស្វែងរកវត្ថុបុរាណដែលបានបាត់បង់យកមកមាតុប្រទេសវិញផងដែរ។

ប្រាសាទកោះកេរ

រដ្ឋលេខាធិការ និងជាអ្នកនាំពាក្យ ក្រសួងវប្បធម៌ និងវិចិត្រសិល្បៈ លោក ថៃ នរៈសត្យា បានឲ្យដឹងថា ក្រុមការងារជំនាញក្រសួងកំពុងធ្វើការលើរឿងនេះ។ លោកបន្តថា ក្រសួងវប្បធម៌ តែងតែព្យាយាមដាក់បញ្ចូលសម្បត្តិវប្បធម៌កម្ពុជាចូលជាបេតិកភណ្ឌពិភពលោក៖ «ក្រសួងតែងតែគិតគូរមិនឈប់ឈរអំពីការអភិរក្សាបេតិកភណ្ឌវប្បធម៌ជាតិយើងនេះឯង ការដាក់បញ្ចូលទៅក្នុងបេតិកភណ្ឌពិភពលោកមួយហើយត្រូវដាក់អីបន្ថែមទៀត»។

ប្រាសាទបន្ទាយឆ្មារ

គិតមកដល់ពេលនេះ កម្ពុជាមានសម្បត្តិបេតិកភណ្ឌពិភពលោកទាំងអស់ចំនួន ៧ហើយ ដែលក្នុងនោះចែកជាសម្បត្តិវប្បធម៌រូបី ៣ និងសម្បត្តិវប្បធម៌អរូបី៤ រួមមាន៖ តំបន់អង្គរវត្ត របាំព្រះរាជទ្រព្យ ល្ខោនស្រមោលស្បែក ឬល្ខោនស្បែកធំ ប្រាសាទព្រះវិហារ ល្បែងទាញព្រ័ត្រ ចាប៉ីដងវែង និងប្រាសាទសំបូរព្រៃគុក ដែលទើបចុះក្នុងបញ្ជីបេតិកភណ្ឌពិភពលោក នៅថ្ងៃទី៨ កក្កដា ឆ្នាំ២០១៧៕

ប្រភព៖ Radio Free Asia ប្រែសម្រួល៖ សំភី