យីងឡាក់ កំពុងរស់នៅប្រទេសចិន?

2018-02-12 00:00:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អតីតនាយករដ្ឋមន្រ្ដីថៃ យីងឡាក់ ស៊ីណាវ៉ាត្រា ត្រូវបានជឿថា កំពុងស្នាក់នៅប្រទេសចិន ដោយសាររូបថតមួយសន្លឹករបស់លោកស្រី ជាមួយបងប្រុស ថាក់ស៊ីន ស៊ីណាវ៉ាត្រា ដែលលេចធ្លាយលើបណ្ដាញសង្គមអនឡាញ គឺជារូបថតនៅផ្សារមួយកន្លែង ក្នុងទីក្រុងប៉េកាំង ប្រទេសចិន។

ក្រុមប៉ូលិសថៃដែលទទួលខុសត្រូវរឿងកំណត់ទីតាំងរបស់លោកស្រីយីងឡាក់ បានបញ្ជាក់នៅព្រឹកព្រលឹមថ្ងៃចន្ទនេះថា ខ្លួនកំពុងស្នើសុំកិច្ចសហការពីអាជ្ញាធរចិន ដើម្បីកំណត់ទីតាំងរបស់លោកស្រីយីងឡាក់។ ក្រមប៉ូលិសថៃ ចង់ដឹងឲ្យប្រាកដ ថាតើរូបមួយសន្លឹកនោះ ពិតជាថតនៅប៉េកាំង ដូចសេចក្ដីរាយការណ៍ មែនឬយ៉ាងណា។

រូបថតលោកស្រីយីងឡាក់ និងលោកថាក់ស៊ីន ដែលគេគិតថាថតនៅប្រទេសចិន

លោកឧត្តមសេនីយ Piyaphong Klinphan អ្នកនាំពាក្យក្រុមប្រឹក្សាជាតិសម្រាប់សន្ដិភាព និងសណ្ឋាប់ធ្នាប់ (NCPO) បានបញ្ជាក់ថា NCPO នៅមិនទាន់ទទួលបានព័ត៌មានជាក់លាក់ណាមួយពីរូបភាពលោកស្រីយីងឡាក់ និងលោកថាក់ស៊ីន នោះនៅឡើយទេ។

ចំណែកអ្នកនាំពាក្យរដ្ឋាភិបាលថៃ លោក Sansern Kaewkamnerd បានបដិសេធមិនបញ្ចេញយោបល់ ជុំវិញបញ្ហារូបភាពមួយសន្លឹកនោះទេ ដោយថាវាមិនមែនជាកិច្ចការរបស់រដ្ឋាភិបាលនោះឡើយ។

គួរបញ្ជាក់ថា លោកស្រី យីងឡាក់ បានបាត់ខ្លួនពីប្រទេសថៃ ចាប់តាំងពីខែសីហា ឆ្នាំ២០១៧មកម៉្លេះ ដោយខកខានមិនបានចូលរួមស្ដាប់ការប្រកាសសាលដីការបស់តុលាការកំពូលថៃ។ លោកស្រី ត្រូវតុលាការចោទប្រកាន់ពាក់ព័ន្ធនឹងរឿងមិនប្រក្រតីក្នុងការទិញស្រូវមកស្ដុកទុក ដែលធ្វើឲ្យខាតបង់ថវិការដ្ឋយ៉ាងហោចណាស់ ៨ពាន់លានដុល្លារ។ កន្លងមក ធ្លាប់មានព័ត៌មានថាលោកស្រី កំពុងសម្ងំលាក់ខ្លួននៅប្រទេសអង់គ្លេស៕

ចុចអាន៖ ថៃ រឹបអូស ទ្រព្យសម្បត្តិរបស់លោកស្រី យីងឡាក់

អត្ថបទ៖ សុខ សុវត្ថិ