ក្រសួងការពារជាតិថា កុំភ្ញាក់ផ្អើល បើមានការចល័តគ្រឿងចម្បាំង ពីថ្ងៃ១៥-៣០មីនា

2018-03-07 12:31:35
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

យោងតាមសេចក្តីជូនដំណឹងរបស់គណៈកម្មការដឹកនាំធ្វើលំហាត់រួមគ្នារវាងកងយោធពលខេមរភូមិន្ទ និងកងទ័ពរំដោះប្រជាជនចិន នៃក្រសួងមហាផ្ទៃ ដែលត្រូវបានផ្សព្វផ្សាយ នៅថ្ងៃទី០៧ ខែមីនា បានប្រាប់ដល់ប្រជាពលរដ្ឋ នៅភូមិសាស្ត្រតំបន់យោធាភូមិភាគទី៣ ជួរភ្នំម្រះព្រៅ ភូមិថ្លុកដូនស ឃុំក្រាំងអំពិល ស្រុកសំរោងទង ខេត្តកំពង់ស្ពឺ កុំឲ្យការភ្ញាក់ផ្អើលចំពោះសំឡេងស្នូរផ្ទុះ និងការចល័តយុទ្ធោបករណ៍យោធា ចន្លោះពីថ្ងៃទី១៥ ដល់៣០ ខែមីនា។

សេចក្ដីជូនដំណឹងនេះ គឺដើម្បីបញ្ជាក់សាជាថ្មី នូវការធ្វើសមយុទ្ធនាគមាសឆ្នាំ២០១៨ រវាងកងទ័ពកម្ពុជា និងចិន ដែលត្រូវរៀបចំនៅទីតាំង និងកាលបរិច្ឆេទដូចខាងលើ។

ឧទ្ធម្ភាគចក្រចិន Z-10 (រូបតំណាង)

ដើម្បីសុវត្ថិភាពគណៈកម្មការដឹកនាំលំហាត់ សំណូមពរដល់រដ្ឋលេខាធិការអាកាសចរណ៍ស៊ីវិល និងអាជ្ញាធរដែនដីដែលមានការពាក់ព័ន្ធ ផ្សព្វផ្សាយព័ត៌មានអំពីលំហាត់បាញ់គ្រាប់ពិតនេះ និងហាមឃាត់ដល់ប្រជាពលរដ្ឋមិនឲ្យចូលទៅក្នុងតំបន់នោះឡើយ។

បើតាមលោក ឥត សារ៉ាត់ អគ្គមេបញ្ជាការរងនៃកងយោធពលខេមរភូមិន្ទ បានថ្លែងប្រាប់អ្នកសារព័ត៌មានកាលពីពេលកន្លងទៅ បានឲ្យដឹងថា សមយុទ្ធយោធានេះ នឹងប្រើប្រាស់សព្វាវុធទំនើបៗដូចជា ឧទ្ធម្ភាគចក្រ Z10 បំពាក់កាំជ្រួចបាញ់ចំគោលដៅ កាំភ្លើងត្បាល់ចូលគោលដៅដែលបានកំណត់ និងរថពាសដែកផងដែរ។ ក្នុងសមយុទ្ធនេះ ភាគីកម្ពុជា មានកងទ័ពចំនួន ២៨០នាក់ ខណៈភាគីចិន មានចំនួន ១៩០នាក់៕