អង់គ្លេស និងអាមេរិក ចោទរុស្ស៊ីថា ប៉ុនប៉ងសម្លាប់អតីតភ្នាក់ងារចារកម្មអង់គ្លេស

2018-03-15 02:12:51
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ចក្រភពអង់គ្លេស និងសហរដ្ឋអាមេរិក បានចោទប្រទេសរុស្ស៊ីថា ប៉ុនប៉ងសម្លាប់អតីតភ្នាក់ងារចារកម្មអង់គ្លេស លោក Sergey Skripal ដែលបានធ្វើឡើងនៅក្រុង Salisbury ប្រទេសអង់គ្លេស កាលពីថ្ងៃទី៤ ខែមីនា ២០១៨ កន្លងទៅ។ ការចោទប្រកាន់នេះ បានធ្វើឡើងក្នុងកិច្ចប្រជុំបន្ទាន់របស់ក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃទី១៤ ខែមីនា ២០១៨។

ក្នុងកិច្ចប្រជុំបន្ទាន់របស់ក្រុមប្រឹក្សាសន្តិសុខនោះ អគ្គរាជទូតអង់គ្លេសប្រចាំអង្គការសហប្រជាជាតិ បានបញ្ជាក់ថា រដ្ឋាភិបាលអង់គ្លេសបានរកឃើញថា រដ្ឋាភិបាលរុស្ស៊ីគឺជាអ្នកទទួលខុសត្រូវសម្រាប់ការប៉ុនប៉ងសម្លាប់លោក Sergey Skripal។

ចំណែកលោកស្រី Nikki Haley អគ្គរដ្ឋទូតអាមេរិកប្រចាំអង្គការសហប្រជាជាតិ បានបញ្ជាក់ថា អាមេរិកជឿជាក់ថា រុស្ស៊ីជាអ្នកទទួលខុសត្រូវសម្រាប់ការវាយប្រហារមនុស្ស ២នាក់ នៅក្នុងចក្រភពអង់គ្លេស ដោយប្រើប្រាស់ភ្នាក់ងារយោធារបស់ខ្លួន។ លោកស្រីបន្ថែមថា ការប៉ុនប៉ងមនុស្សឃាតនេះ គឺជាផ្នែកមួយនៃការលេចឡើងជាថ្មីនូវការប្រើប្រាស់អាវុធគីមីហាមឃាត់។

លោកស្រី Nikki Haley អគ្គរដ្ឋទូតអាមេរិកប្រចាំអង្គការសហប្រជាជាតិ

សូមបញ្ជាក់ថា លោកស្រីនាយករដ្ឋមន្ត្រីអង់គ្លេស Theresa May បានសម្រេចបណ្ដេញមន្ត្រីការទូតរបស់រុស្ស៊ីចំនួន ២៣រូប ចេញពីប្រទេសអង់គ្លេស បន្ទាប់ពីទីក្រុងមូស្គូ បដិសេធក្នុងការបកស្រាយពីករណីភ្នាក់ងារចារកម្មរបស់កងទ័ពរុស្ស៊ី ចូលមកធ្វើឃាតអតីតភ្នាក់ងារចារកម្មរបស់អង់គ្លេសលោក Sergei Skripal៕

អត្ថបទពាក់ព័ន្ធ

អង់គ្លេស បណ្ដេញមន្ត្រីទូតរុស្ស៊ីចេញពីប្រទេស ខណៈរុស្ស៊ីប្រតិកម្មវិញភ្លាមៗ

ប្រភព៖ RT ប្រែសម្រួល៖ វាសនា