ផ្សារទំនើបអ៊ីអនទី២ នឹងត្រូវបើកដំណើរការនៅចុងខែ...

2018-03-25 08:12:54
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

រដ្ឋមន្រ្តីក្រសួង រៀបចំដែនដី នគររូបនីយកម្ម និងសំណង់ លោក ជា សុផារ៉ា បានបង្ហើបឲ្យដឹងថា ផ្សារទំនើបលំដាប់អន្តរជាតិ អ៊ីអនម៉ល២ ដែលស្ថិតនៅខណ្ឌសែនសុខ រាជធានីភ្នំពេញ អាចនឹងត្រូវដាក់ឲ្យដំណើរការនៅចុងខែឧសភាខាងមុខនេះហើយ។ ការថ្លែងនេះ បានធ្វើឡើងក្នុងពិធីបើកការដ្ឋានសាងសង់ផ្សារទំនើប PH Diamond Place កាលពីថ្ងៃទី២៤ ខែមីនា ឆ្នាំ២០១៨។

លោក ជា សុផារ៉ា ថ្លែងនាពេលកន្លងមក

ផ្សារទំនើបដែលគ្រប់គ្រងដោយក្រុមហ៊ុនជប៉ុននេះ ត្រូវបានចាប់ផ្ដើមសាងសង់នៅចុងឆ្នាំ២០១៦ ដោយចំណាយ ១២០លានដុល្លារ លើផ្ទៃដីទំហំ ១០ម៉ឺនម៉ែត្រការ៉េ ពោលគឺធំជាងទីតាំងទីមួយ ២ម៉ឺនម៉ែត្រការ៉េ។

ប្រធានផ្សារទំនើបអ៊ីអនម៉ល ប្រចាំនៅកម្ពុជា លោក Makoto Yajima ធ្លាប់បានលើកឡើងថា ដោយមើលឃើញផលវិបាករបស់ប្រជាជននៅភាគខាងជើងទីក្រុងភ្នំពេញដែលមានជីវភាពប្រសើរ តែមិនអាចធ្វើដំណើរមកទីតាំងទី១ នៅថ្ងៃចុងសប្ដាហ៍បាន ដោយសារការកកស្ទះចរាចរណ៍ខ្លាំងនោះ ទើបមានការសាងសង់គម្រោងទី២នេះ និងរំពឹងថាអាចទាក់ទាញអតិថិជនទាំងនោះ ឲ្យទៅកម្សាន្តបាន។

រូបគំរូផ្សារទំនើបអ៊ីអនម៉ល២

គួររំលឹកផងដែរថា ផ្សារទំនើបអ៊ីអនម៉លសាខាទី១ ក្បែរស្ថានទូតរុស្ស៊ី ផ្លូវសុធារស ត្រូវបានបើកដំណើរការក្នុងអំឡុងពាក់កណ្តាលឆ្នាំ២០១៤ ក្រោយបញ្ចប់ការសាងសង់រយៈពេល១៨ខែ ដោយបានបោះទុនវិនិយោគប្រមាណជាង ២០៥ លានដុល្លារ៕

អត្ថបទ៖ ឈុត សិរីឧត្តម