តម្លៃម្រេចធ្លាក់ចុះយ៉ាងគំហុក ខណៈរដូវប្រមូលផលត្រូវអូសបន្លាយយូរជាងមុន
- 2018-04-06 08:52:46
- ចំនួនមតិ 0 | ចំនួនចែករំលែក 0
តម្លៃម្រេចធ្លាក់ចុះយ៉ាងគំហុក ខណៈរដូវប្រមូលផលត្រូវអូសបន្លាយយូរជាងមុន
ចន្លោះមិនឃើញ
ប្រធានសហគមន៍ម្រេចសរីរាង្គគគីរមេមង ដែលស្ថិតក្នុងស្រុកមេមត់ ខេត្តត្បូងឃ្មុំ លោក ភុំ សុវឌ្ឍន់ បានប្រាប់ឲ្យដឹងថា នៅឆ្នាំនេះ កសិករដាំម្រេចក្នុងសហគមន៍របស់លោកជួបប្រទះបញ្ហាធំ២គឺ ការធ្លាក់ចុះទិន្នផលបង្កឡើងដោយការប្រែប្រួលអាកាសធាតុ និងបញ្ហាតម្លៃម្រេចថោកពិបាករកទីផ្សារលក់ចេញ។
ប្រធានសហគមន៍រូបនេះ អះអាងថា តម្លៃជាង ៣ដុល្លារក្នុង១គីឡូក្រាមនេះ បើក្នុងករណីកសិករធ្វើដោយខ្លួនឯង គឺកសិករអាចនៅចំណេញបានបន្តិចបន្តួច តែបើប្រើកម្លាំងពលកម្មជួលគេវិញ គឺពួកគាត់នឹងមិនចំណេញអ្វីឡើយ។ លោកបញ្ជាក់ថា តម្លៃម្រេចចុះថោកខ្លាំងនេះ បានកើតឡើងពីរឆ្នាំចុងក្រោយនេះ ដែលធ្វើឱ្យកសិករជាច្រើនត្អូញត្អែរ និងខាតបង់ប្រាក់ចំណូល។
ប្រធានសហគមន៍ដដែលឱ្យដឹងទៀតថា ការបង្កបង្កើនផលម្រេចនៅឆ្នាំនេះ ក៏ជួបប្រទះនឹងបញ្ហាប្រឈមខ្លាំងរឿងប្រែប្រួលអាកាសធាតុផងដែរ គឺរដូវប្រមូលផលត្រូវអូសបន្លាយរហូតដល់ទៅ២ខែ។ លោកបញ្ជាក់ថា កាលពីឆ្នាំមុនៗ ម្រេចពេញប្រមូលផលនៅអំឡុងខែមេសា ប៉ុន្តែនៅឆ្នាំនេះដល់ខែមេសាទៅហើយ ម្រេចទើបតែប្រមូលផលបានប្រហែល ២០% ប៉ុណ្ណោះ។ ដូច្នេះរដូវប្រមូលផល នឹងត្រូវអូសបន្លាយដល់ខែឧសភា និងមិថុនាខាងមុខ។
លោក ភុំ សុវឌ្ឍន់ ថ្លែងថា បញ្ហាប្រឈមទាំងនេះមិនមែនកើតមានតែសម្រាប់សហគមន៍របស់លោកនោះទេ ពោលគឺកសិករអ្នកដាំម្រេចនៅតំបន់ដទៃទៀតក្នុងប្រទេសកម្ពុជាសុទ្ធសឹងតែជួបប្រទះបញ្ហាទាំងនេះដូចគ្នា។
ចំណែកអ្នកជំនាញខាងកសិកម្ម បណ្ឌិត យ៉ង សាំងកុមារ កត់សម្គាល់ថា តម្រូវការម្រេចនៅលើទីផ្សារពិភពលោកនៅតែច្រើនដដែល ក៏ប៉ុន្តែម្រេចដែលកម្ពុជាផលិតបានភាគច្រើន មិនបាននាំទៅដល់ទីផ្សារអន្តរជាតិនោះឡើយ។
លោកបន្តថា ទីផ្សារធំបំផុតរបស់ម្រេចកម្ពុជា គឺវៀតណាម ហើយនៅក្នុងរយៈពេលប៉ុន្មានឆ្នាំចុងក្រោយនេះ វៀតណាមផលិតម្រេចលើសពីតម្រូវការ ដូច្នេះវៀតណាមបានកាត់បន្ថយការទិញម្រេចពីកសិករកម្ពុជា ហេតុដូចនេះហើយទើបម្រេចកម្ពុជាជួបប្រទះបញ្ហាទីផ្សារ និងធ្លាក់ថ្លៃយ៉ាងគំហុកដូច្នេះ។
លោកបានជំរុញឲ្យរដ្ឋាភិបាលត្រូវលូកដៃធ្វើអន្តរាគមន៍រឿងនេះទោះក្នុងកម្រិតណាក៏ដោយ ដើម្បីកុំឱ្យប្រជាកសិករ និងផលិតករម្រេច បាក់ទឹកចិត្តបោះបង់ចោលការដាំដុះដំណាំឧស្សាហកម្មមួយនេះ។
សូមរម្លឹកថា កាលពីឆ្នាំ២០១៧ កន្លងទៅ ផ្ទៃដីដាំដុះម្រេចនៅទូទាំងប្រទេស មានចំនួនជាង ៦ពាន់ហិចតា ដែលផ្ដល់ផលសរុបជាង ២ម៉ឺនតោន៕