ទីតាំងធ្វើប័ណ្ណព្រំដែនកម្ពុជា-ថៃ នឹងត្រូវបើកកន្លែងថ្មី១ទៀត ដើម្បីបំពេញតម្រូវការពលរដ្ឋ
- 2018-04-20 07:03:19
- ចំនួនមតិ 0 | ចំនួនចែករំលែក 0
ទីតាំងធ្វើប័ណ្ណព្រំដែនកម្ពុជា-ថៃ នឹងត្រូវបើកកន្លែងថ្មី១ទៀត ដើម្បីបំពេញតម្រូវការពលរដ្ឋ
ចន្លោះមិនឃើញ
រដ្ឋបាលនៃសាលាខេត្តបាត់ដំបង នឹងបើកទីតាំងធ្វើប័ណ្ណព្រំដែនកម្ពុជា-ថៃ ១កន្លែងទៀត នៅក្នុងស្រុកសំពៅលូន ដើម្បីបំពេញតម្រូវការពលរដ្ឋ ខណៈពួកគាត់កំពុងសម្រុក ទៅធ្វើនៅសាលាខេត្ត កាន់តែមានចំនួនច្រើនឡើង និងមានការកកស្ទះ។
លោក សឿម ប៊ុនរិទ្ធិ អភិបាលរងខេត្តបាត់ដំបង បានមានប្រសាសន៍ថា ទីតាំងគ្រោងបើកបន្ថែម នៅស្រុកសំពៅលូននោះ ធ្វើនៅការិយាល័យច្រកចេញចូលតែមួយ ហើយបង្កភាពងាយស្រួលដល់ពលរដ្ឋ អាចទៅធ្វើនៅទីនោះបាន ដោយមិនចាំបាច់មកធ្វើដល់សាលាខេត្តទេ។
លោកបន្តថា គម្រោងនេះ នឹងបើកនាពេលឆាប់ៗខាងមុខ ដោយបច្ចុប្បន្នរដ្ឋបាលខេត្តកំពុងរៀបចំឲ្យមន្ត្រីជំនាញទៅបណ្ដុះបណ្ដាលមន្ត្រីនៅស្រុកសំពៅលូនជាមុនសិន ទើបចូលធ្វើការងារនេះបាន ហើយមន្ត្រីទាំងអស់នោះ ត្រូវធ្វើការតាមប្រព័ន្ធកុំព្យូទ័រ ។
បន្ថែមពីលើនេះទៀត អភិបាលរងខេត្តថា មុននឹងអាចធ្វើប័ណ្ណនេះបាន ទាល់តែមានឯកសារ៣ គឺអត្តសញ្ញាណប័ណ្ណ សៀវភៅគ្រួសារ និងសំបុត្រកំណើត ហើយចំណាយ ២ម៉ឺនរៀល ទើបអាចចូលទៅថៃ ត្រឹមខេត្តត្រាត ខេត្តច័ន្ទបុរី និងខេត្តស្រះកែវ មានសុពលភាពត្រឹម៧ថ្ងៃ ពេលតមិនចាំបាច់មកដល់សាលាខេត្តនោះទេអាចធ្វើតាមព្រំដែនបាន ហើយអាចប្រើប្រាស់បានចំនួន២ឆ្នាំ ។
លោក សឿម ប៊ុនរិទ្ធិ បានបញ្ជាក់ថា ប័ណ្ណព្រំដែនកម្ពុជា-ថៃនេះ ប្រើប្រាស់ខុសពីលិខិតឆ្លងដែន ព្រោះបើចូលតាមច្រកណា ត្រូវចេញមកវិញតាមច្រកនោះ មិនដូចលិខិតឆ្លងដែន បើជិះយន្តហោះទៅហើយអាចជិះរថយន្តចេញ តាមច្រកណាមួយក៏បាន ។
គួរបញ្ជាក់ថា ពីថ្ងៃទី៧ ខែមករា រហូតដល់ថ្ងៃទី១៩ ខែមេសា ឆ្នាំ២០១៨ មានពលរដ្ឋមកធ្វើប័ណ្ណព្រំដែនកម្ពុជា-ថៃ ចំនួន៦៤៥១នាក់៕