រថភ្លើង សិរីសោភ័ណ-បាត់ដំបង ចាប់ផ្ដើមដំណើរការជាបណ្ដោះអាសន្ន នាថ្ងៃ២៩មេសា

2018-04-28 09:06:03
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ពិធីដាក់ឲ្យប្រើប្រាស់ជាបណ្តោះអាសន្ននូវគម្រោងផ្លូវរថភ្លើងដឹកអ្នកដំណើរ សិរីសោភ័ណ-បាត់ដំបង នឹងប្រព្រឹត្តទៅ នៅថ្ងៃអាទិត្យ ទី២៩ ខែមេសា ឆ្នាំ២០១៨ វេលាម៉ោង ៨ព្រឹក នៅស្ថានីយរថភ្លើងសិរីសោភ័ណ។ លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន នឹងចូលរួមក្នុងពិធីនេះ។

ស្ថានីយសិរីសោភ័ណ (រូបថត៖ ក្រសួងសាធារណការ និងដឹកជញ្ជូន)

ផ្លូវរថភ្លើងនេះ មានប្រវែង ៦៥ គ.ម ចាប់ពីទីក្រុងសិរីសោភ័ណ ខេត្តបន្ទាយមានជ័យ ដល់ទីរួមខេត្តបាត់ដំបង ដែលមាន ១០ស្ថានីយ រួមមាន៖ សិរីសោភ័ណ មង្គលបូរី ចម្ការចេក ភ្នំតូច ទួលសំរោង ជ្រោយស្ដៅ ជណ្ដើរស្វា អូរតាគី សៀម និងបាត់ដំបង។

ផ្លូវដែក ប៉ោយប៉ែត-សិរីសោភ័ណ-បាត់ដំបង (រូបថត៖ ក្រសួងសាធារណការ និងដឹកជញ្ជូន)

សូមរំឭកថា កាលពីថ្ងៃទី៤ ខែមេសា ឆ្នាំ២០១៨ ក្រសួងសាធារណការ និងដឹកជញ្ជូន បានដាក់ឲ្យដំណើរការនូវខ្សែរថភ្លើងដឹកអ្នកដំណើរពីប៉ោយប៉ែត មកកាន់សិរីសោភ័ណ ទីរួមខេត្តបន្ទាយមានជ័យ។ រថភ្លើងដឹកអ្នកដំណើរនៅព្រំដែនថៃនេះ នឹងដឹកអ្នកដំណើរដោយមិនគិតថ្លៃ រហូតដល់ថ្ងៃទី១ ខែសីហា ឆ្នាំ២០១៨។ ផ្លូវរថភ្លើង ប៉ោយប៉ែត-សិរីសោភ័ណ-បាត់ដំបង មានចម្ងាយសរុប ១១៣ គ.ម។

តាមគម្រោង បន្ទាប់ពីដាក់ឲ្យដំណើរការកំណាត់ផ្លូវរថភ្លើងពីប៉ោយប៉ែត ជាប់ព្រំដែនថៃ មកកាន់សិរីសោភ័ណ និងបន្តដល់ខេត្តបាត់ដំបង គឺក្រសួងសាធារណការ និងដឹកជញ្ជូន ក៏គ្រោងនឹងភ្ជាប់ការដឹកជញ្ជូនតាមផ្លូវដែកពីបាត់ដំបង មកកាន់រាជធានីភ្នំពេញផងដែរ៕

អត្ថបទ៖ លីហៀង