ឆ្នាំនេះ កសិករប្រមូលផលម្រេចបានតិចជាងឆ្នាំមុន

2018-05-07 06:14:20
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រធានសមាគមលើកកម្ពស់ម្រេចកំពត លោក ងួន ឡាយ ថ្លែងថា ម្រេចកំពតនៅឆ្នាំនេះ អាចប្រមូលផលបានត្រឹមចន្លោះពី ៧០ ទៅ ៧៥ តោន ប៉ុណ្ណោះ ធៀបទៅនឹងឆ្នាំមុន ដែលប្រមូលបានប្រហែល ១០០ តោន។ ម្យ៉ាងវិញទៀត រដូវប្រមូលផលនៅឆ្នាំនេះ អាចនឹងអូសបន្លាយរហូតដល់ក្រោយខែមិថុនា ជាពេលវេលា ដែលម្រេចចុងរដូវទាំងនោះ មិនអាចប្រើឈ្មោះម្រេចកំពតបានឡើយ។

ម្រេចខៀវ

លោកបញ្ជាក់ថា គិតមកដល់ដើមខែឧសភា នេះទៅហើយ ម្រេចកំពតទើបតែប្រមូលផលបានប្រមាណ ២០ ភាគរយប៉ុណ្ណោះ៖ «**មានក្រុមហ៊ុនខ្លះក៏គេចាប់ផ្ដើមទិញហើយដែរ តែគេទិញផ្ទាល់ពីកសិករ។ គេទិញបណ្ដើរៗហើយ ប៉ុន្តែយើងក៏គ្មានម្រេចលក់ឱ្យប៉ុន្មានដែរ ព្រោះមកដល់ពេលនេះ យើងទើបតែប្រមូលផលបាន ១៥ ទៅ ២០ភាគរយតែប៉ុណ្ណោះជារួម។ យើងអត់ទាន់បានប្រមូលផលពេញទេ ពីព្រោះម្រេចឆ្នាំនេះទើបតែផ្លែក្រោយ។ ចំពោះរូបខ្ញុំផ្ទាល់វិញ មិនទាន់បានប្រមូលផលមួយគ្រាប់ផង ទាល់តែខែ ៦ ទើបបានបេះ**»។

ទោះជាយ៉ាងណា លោក ងួន ឡាយ បញ្ជាក់ថា លោកមិនមានការបារម្ភ អំពីម្រេចក្នុងតំបន់របស់លោកនោះទេ ទាក់ទងនឹងបញ្ហាទីផ្សារ និងតម្លៃ ក៏ប៉ុន្តែលោកសោកស្ដាយ និងអាណិតដល់កសិករអ្នកដាំម្រេច នៅតំបន់ដទៃ ដែលកំពុងជួបប្រទះ ការលំបាកយ៉ាងខ្លាំង ដោយសារតម្លៃម្រេច បន្តធ្លាក់ចុះខ្លាំង គឺមិនដល់ មួយម៉ឺនរៀលផង ក្នុងមួយគីឡូក្រាម។ លោកអះអាងថា តម្លៃទាបបែបនេះ មិនអាចធ្វើឱ្យកសិករទទួលបានផលចំណេញ ពីដំណាំម្រេចឡើយ មានតែការខាតបង់ប៉ុណ្ណោះ។

អ្នកជំនាញខាងកសិកម្ម បណ្ឌិត យ៉ង សាំងកុមារ ថ្លែងថា រដ្ឋគួរតែយកចិត្តទុកដាក់ឱ្យបានខ្លាំងក្លាចំពោះដំណាំម្រេច ដោយសារកម្ពុជា មានសក្ដានុពល ចំពោះការដាំដុះម្រេច ហើយមានកសិករជាច្រើន នៅទូទាំងប្រទេស បានវិនិយោគធនធានរបស់ខ្លួន ដាំដុះម្រេចនេះរួចទៅហើយ។

លោកប៉ាន់ស្មាន់ថា បើមានការរៀបចំត្រឹមត្រូវ ផ្នែកគោលនយោបាយ និងទីផ្សារ កម្ពុជា នឹងអាចរកចំណូលបានពី ៣ ទៅ ៥ រយលានដុល្លារអាមេរិកក្នុងមួយឆ្នាំៗ។ ដូច្នេះរដ្ឋត្រូវតែលូកដៃ ធ្វើអន្តរាគមន៍ ចំពោះបញ្ហាគ្មានទីផ្សារ និងតម្លៃធ្លាក់ចុះនេះ ទោះបីជាក្នុងកម្រិតណាក៏ដោយ ដើម្បីកុំឱ្យប្រជាកសិករ និងអ្នកផលិតម្រេច បាក់ទឹកចិត្ត បោះបង់ចោលការដាំដុះដំណាំឧស្សាហកម្មមួយនេះ។

ម្រេចក្រហម

ទោះជាយ៉ាងណា លោក ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម បានបង្ហាញសុទិដ្ឋិនិយម ចំពោះស្ថានភាពល្អប្រសើរនៃវិស័យម្រេចកម្ពុជា បើទោះបីជាមានការប្រែប្រួលតម្លៃក៏ដោយ ពោលគឺអាចរក្សាបានចំណែកទីផ្សារក្នុងតំបន់ និងពិភពលោក។ ការលើកឡើងនេះ ធ្វើឡើងក្នុងពិធីបិទវេទិកាម្រេច លើកទី២ ដែលរៀបចំឡើងនៅទីស្តីការក្រសួងពាណិជ្ជកម្ម កាលពីថ្ងៃទី២៤ ខែមេសា ឆ្នាំ២០១៨។

ក្រសួងពាណិជ្ជកម្ម បង្ហាញថា ម្រេចគឺជាដំណាំដ៏មានសក្តានុពលរបស់កម្ពុជា ដែលត្រូវបានក្រសួងពាណិជ្ជកម្ម ដាក់បញ្ចូលនៅក្នុងយុទ្ធសាស្ត្រសមាហរណកម្មពាណិជ្ជកម្ម (CTIS) ដើម្បីអភិវឌ្ឍសង្វាក់តម្លៃ និងធ្វើពិពិធកម្មការនាំចេញ។ បច្ចុប្បន្ន ម្រេចត្រូវបានដាំដុះនៅក្នុងខេត្តចំនួន១៩ លើផ្ទៃដីប្រមាណជាង ៦,៦ពាន់ហិចតា ហើយផ្តល់ទិន្នផលប្រហែលជាង ២ម៉ឺនតោនក្នុងមួយឆ្នាំ៕

អត្ថបទទាក់ទង៖

ប្រភព៖ Radio Free Asia ប្រែសម្រួល៖ សំភី