រដ្ឋមន្រ្តីពាណិជ្ជកម្មអះអាងថា ម្រេចកម្ពុជានៅតែអាចរក្សាបានស្ថានភាពល្អ បើទោះបីជា...

2018-04-25 01:39:11
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម នៅតែបង្ហាញសុទិដ្ឋិនិយម ចំពោះស្ថានភាពល្អប្រសើរនៃវិស័យម្រេចកម្ពុជា បើទោះបីជាមានការប្រែប្រួលតម្លៃក៏ដោយ ពោលគឺអាចរក្សាបានចំណែកទីផ្សារក្នុងតំបន់ និងពិភពលោក។ ការលើកឡើងនេះ ក្នុងពិធីបិទវេទិកាម្រេច លើកទី២ ដែលរៀបចំឡើងនៅទីស្តីការក្រសួងពាណិជ្ជកម្ម កាលពីរសៀលថ្ងៃទី២៤ ខែមេសា ឆ្នាំ២០១៨។

លោក ប៉ាន សូរស័ក្តិ (កណ្តាល) ក្នុងវេទិកាម្រេច កាលពីថ្ងៃទី២៤ ខែមេសា ឆ្នាំ២០១៨។ រូបថត៖ FB ក្រសួងពាណិជ្ជកម្ម

លោក ប៉ាន សូរស័ក្តិ បានគូសបញ្ជាក់ថា បច្ចុប្បន្នក្រសួងពាណិជ្ជកម្ម កំពុងសហការជាមួយដៃគូអភិវឌ្ឍន៍ ដើម្បីរៀបចំរចនាសម្ព័ន្ធដឹកនាំ និងបណ្តាញផ្គត់ផ្គង់ច្បាស់លាស់ ជាមួយគោលនយោបាយសមស្រប សំដៅធានាអភិវឌ្ឍវិស័យម្រេចកម្ពុជាប្រកបដោយនិរន្តរភាព ហើយនៅឆ្នាំខាងមុខ វិស័យនេះនឹងកាន់តែរឹងមាំឡើងៗ ប្រហាក់ប្រហែលនឹងវិស័យស្រូវ/អង្ករ និងដំឡូងមីដែរ។

ទន្ទឹមគ្នានេះ លោករដ្ឋមន្ត្រីបានផ្តល់អនុសាសន៍ឲ្យភាគីពាក់ព័ន្ធ ដើម្បីអភិវឌ្ឍវិស័យម្រេច និងបានសំណូមពរដល់ជំនាញការជាតិ និងអន្តរជាតិ ពន្លឿនការចងក្រងសេចក្តីព្រាងគោលនយោបាយម្រេច ដើម្បីដាក់ឆ្លងគណៈកម្មការបច្ចេកទេសអន្តរក្រសួង មុនពេលស្នើសុំការអនុម័តពីរាជរដ្ឋាភិបាល។ គោលនយោបាយនោះ នឹងត្រូវផ្តោតលើកិច្ចសម្រួលពាណិជ្ជកម្ម ប្រព័ន្ធកាត់បន្ថយថ្លៃដើមផលិតកម្ម ប្រព័ន្ធឡូជីស្ទីក ជំនួយឥណទាន បច្ចេកទេសដាំដុះថែទាំ និងការកសាងទំនុកចិត្តលើទីផ្សារ រាប់ទាំងប្រព័ន្ធសុវត្ថិភាព គុណភាព ស្លាកសញ្ញា និងនិមិត្តសញ្ញាម្រេចខ្មែរជាដើម។

ក្រសួងពាណិជ្ជកម្ម បង្ហាញថា ម្រេចគឺជាដំណាំដ៏មានសក្តានុពលរបស់កម្ពុជា ដែលត្រូវបានក្រសួងពាណិជ្ជកម្ម ដាក់បញ្ចូលនៅក្នុងយុទ្ធសាស្ត្រសមាហរណកម្មពាណិជ្ជកម្ម (CTIS) ដើម្បីអភិវឌ្ឍសង្វាក់តម្លៃ និងធ្វើពិពិធកម្មការនាំចេញ។ បច្ចុប្បន្ន ម្រេចត្រូវបានដាំដុះនៅក្នុងខេត្តចំនួន១៩ លើផ្ទៃដីប្រមាណជាង ៦,៦ពាន់ហិចតា ហើយផ្តល់ទិន្នផលប្រហែលជាង ២ម៉ឺនតោនក្នុងមួយឆ្នាំ៕