ខែលមីស៊ីលស៊ីរី ត្រូវអ៊ីស្រាអែលប្រើមីស៊ីលពីអាកាស បាញ់កម្ទេចចោល

2018-05-10 06:44:24
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រទេសអ៊ីស្រាអែល បានបាញ់ហ្វូងមីស៊ីលជាច្រើនចូលក្នុងទឹកដីរបស់ស៊ីរី ដោយបានកម្ទេចរ៉ាដា និងខែលមីស៊ីលស៊ីរី ដែលបានដំឡើងនៅក្នុងក្រុង Damascus។ នេះបើតាមសារព័ត៌មានរដ្ឋស៊ីរី SANA ចេញផ្សាយនៅថ្ងៃទី១០ ខែឧសភា ២០១៨នេះ។

ហ្វូងមីស៊ីលរបស់អ៊ីស្រាអែល ដែលបានចេញពីយន្តហោះចម្បាំងនៅក្រៅទឹកដីរបស់ស៊ីរី បានចាប់ផ្ដើមពីល្ងាចថ្ងៃទី៩ ខែឧសភា ២០១៨ បន្តរហូតដល់ព្រឹកថ្ងៃទី១០ ខែឧសភា ២០១៨នេះ។ ក្នុងនោះ ខែលមីស៊ីលរបស់ស៊ីរី បានបាញ់ទម្លាក់មីស៊ីលអ៊ីស្រាអែលជាង ១០គ្រាប់។

សារព័ត៌មានរដ្ឋស៊ីរីបានរាយការណ៍ថា ការបាញ់មីស៊ីលរបស់អ៊ីស្រាអែល គឺសំដៅមកលើទីតាំងខែលមីស៊ីលរបស់ស៊ីរី ដែលបានកម្ទេចរ៉ាដា និងប្រព័ន្ធខែលមីស៊ីលរបស់ស៊ីរីមួយចំនួន។

ចំណែកខាងកងទ័ពអ៊ីស្រាអែលវិញបានបញ្ជាក់ថា កងទ័ពអាកាសរបស់ខ្លួនបានបើកការវាយប្រហារ គឺសំដៅលើមូលដ្ឋានរបស់អ៊ីរ៉ង់ នៅក្នុងប្រទេសស៊ីរី។ អ៊ីស្រាអែលបញ្ជាក់ទៀតថា ការវាយប្រហារនេះ ដោយសារទីតាំងរបស់កងទ័ពអ៊ីស្រាអែលនៅក្នុងតំបន់ Golan Heights បានរងការវាយប្រហារពីមីស៊ីលជាង ២០គ្រាប់ ដែលបាញ់ដោយកងទ័ពអ៊ីរ៉ង់។

សូមបញ្ជាក់ថា ប្រទេសអ៊ីស្រាអែលក៏ធ្លាប់បានលើកឡើងដែរថា ប្រទេសអ៊ីរ៉ង់បានបង្កើតមូលដ្ឋានកងទ័ពរបស់ខ្លួននៅក្នុងប្រទេសស៊ីរី ដើម្បីធ្វើការវាយប្រហារមកលើប្រទេសអ៊ីស្រាអែល៕