បឹងកក់ ក្លាយជាតំបន់អភិវឌ្ឍន៍អចលនទ្រព្យលេចធ្លោជាងគេ

2018-05-18 06:02:11
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អ្នកជំនាញវាយតម្លៃអចលនទ្រព្យបានប្រៀបប្រដូចសន្ទុះនៃការអភិវឌ្ឍតំបន់បឹងកក់ ជាមួយនឹងតំបន់អភិវឌ្ឍន៍ ផ្សារទំនើបអ៊ីអនម៉លទី២ ក្នុងខណ្ឌសែនសុខ ខណៈដែលកន្លងមក បឹងកក់ ត្រូវបានចាត់ទុកថាជាតំបន់ ដែលមានការអភិវឌ្ឍលឿនជាងគេទី៣ បន្ទាប់ពីតំបន់មាត់ទន្លេ (តំបន់អភិវឌ្ឍន៍ទីក្រុងកោះពេជ្រ) និងបឹងកេងកង១។

លោក សន សៀប អគ្គនាយកក្រុមហ៊ុន Key Real Estate បានថ្លែងឲ្យដឹងថា តំបន់បឹងកក់នាពេលបច្ចុប្បន្ននេះ នៅតែមានសន្ទុះនៃការអភិវឌ្ឍយ៉ាងលឿនទៅមុខ ស្រដៀងគ្នានឹងតំបន់ផ្សារទំនើប អ៊ីអនម៉លទី២ដែរ។

រូបគំរូនៃតំបន់អភិវឌ្ឍន៍បឹងកក់ (រូបថត៖ វិបសាយ ភ្នំពេញ ស៊ីធី សេនធ័រ)

យ៉ាងណាមិញ អ្នកជំនាញអចលនទ្រព្យរូបនេះ បានកត់សម្គាល់ថា តំបន់បឹងកក់មានការរៀបចំ និងការប្រើប្រាស់ដី សម្រាប់គម្រោងអភិវឌ្ឍន៍ថ្មីៗ ដោយមានការរចនាបែបទំនើបដែលភាគច្រើនត្រូវបានរៀបចំដោយក្រុមអ្នកជំនាញមកពីប្រទេសសិង្ហបុរី។ លោកថា នៅពេលដែលគម្រោងទាំងនោះលេចរូបរាងឡើង នឹងមានភាពប្រកួតប្រជែងខ្លាំង សម្រាប់ភាពទាក់ទាញពីប្រជាជន និងភ្ញៀវទេសចរចូលទស្សនាកម្សាន្តក្នុងតំបន់ទីក្រុងរណបនេះ។

យោងតាមអត្ថបទរបស់ក្រុមហ៊ុន ភ្នំពេញ ស៊ីធី សេនធ័រ ដែលជាម្ចាស់គម្រោងអភិវឌ្ឍន៍ទីក្រុងរណបនេះ ចេញផ្សាយកាលពីចុងខែមីនាកន្លងមកបានបង្ហាញថា គម្រោងមណ្ឌលកម្សាន្តផ្សារទំនើប Eden Garden ដែលមានផ្ទៃក្រឡា ២១ ០០០ ម៉ែត្រការ៉េ គ្រោងនឹងបើកដំណើការឆាប់ៗខាងមុខនេះ ខណៈដែលបច្ចុប្បន្នមានហាងកាហ្វេ និងភោជនីយដ្ឋានល្បីៗជាច្រើនបានបើកដំណើរការអាជីវកម្មរបស់ខ្លួន នៅក្នុងផ្សារទំនើបនេះហើយ។ តួយ៉ាងមានដូចជាហាងកាហ្វេម៉ាកយីហោ របស់អាមេរិក Starbucks ភោជនីយដ្ឋានរបស់ប្រទេសថៃ S&P និងប្រភេទហាងជាច្រើនផ្សេងៗទៀត។

ផ្លូវក្នុងតំបន់បឹងកក់

ក្រៅពីនេះ ក៏មានគម្រោងផ្សារទំនើប SUPERSTORE រោងកុនភាពយន្ត LEGEND និងក្លឹបរាំ EPIC ដែលគ្រោងនឹងបើកដំណើការនៅត្រឹមខែឧសភា ឬខែមិថុនាខាងមុខនេះ។ មិនតែប៉ុណ្ណោះ គម្រោង One Park កំពុងលេចធ្លោជាងគេលើការអភិវឌ្ឍលំនៅដ្ឋានប្រណិត ដែលរួមមានទាំងផ្ទះល្វែង និងអគារខុនដូ។

បើតាមការលើកឡើងរបស់លោក សន សៀប បានបញ្ជាក់ថា ផ្ទះល្វែងក្នុងគម្រោងនេះដែលមានកម្ពស់ចាប់ពី ៣ទៅ៤ជាន់ មានតម្លៃចាប់ពី ៥០ទៅ៦០ម៉ឺនដុល្លារ ក្នុងមួយល្វែង ខណៈដែលខុនដូមានតម្លៃចាប់ពី ២៨០០ ទៅ៣០០០ដុល្លារ ក្នុងមួយម៉ែត្រការ៉េ។ លោកបានបន្ថែមថា តម្លៃដីក្នុងតំបន់នេះនឹងមិនហក់ឡើងខ្លាំងទៀតនោះទេ លុះត្រាតែមានការអភិវឌ្ឍរួចហើយទើបឡើងថ្លៃខ្លាំងថែមទៀត ដោយសារតែបច្ចុប្បន្នតម្លៃដីក្នុងតំបន់បឹងកក់កើនឡើងដល់ ៣៥០០ ទៅ ៤៥០០ ដុល្លារ ក្នុងមួយម៉ែត្រការ៉េ។

បឹងកក់ដែលធ្លាប់តែជាបឹងធំជាងគេមួយ ស្ថិតនៅចំកណ្តាលបេះដូងនៃរាជធានីភ្នំពេញ ត្រូវបានគេមើលស្ទើរលែងស្គាល់ទៅហើយថាជាបឹងកក់ពីមុននោះ ដោយសារតែបច្ចុប្បន្នមានសំណង់អគារខ្ពស់ៗ និងគម្រោងអភិវឌ្ឍន៍ ចម្រុះផ្សេងៗជាច្រើនផ្សេងទៀត ព្រមទាំងមានការអភិវឌ្ឍហេដ្ឋារចនាសម្ព័ន្ធ ជាពិសេសផ្លូវត្រូវបានចាក់បេតុងខ្វាត់ខ្វែងជាច្រើនខ្សែផងដែរ។

ផែនទីបង្ហាញពីតំបន់បឹងកក់ ក្រោយត្រូវបានចាក់ដីបំពេញ

កាលពីអំឡុងឆ្នាំ២០១៤ ក្រុមហ៊ុនស៊ូកាកូ អ៊ីន (Shukaku Inc) ទទួលបានសិទ្ធិពីរាជរដ្ឋាភិបាលកម្ពុជា ដើម្បីអភិវឌ្ឍតំបន់បឹងកក់ដែលមានផ្ទៃដីប្រមាណជាង ១១១ហិកតានេះ ឲ្យក្លាយជាទីក្រុង ដែលគ្របដណ្តប់ ដោយលំនៅដ្ឋានប្រណិត ទីតាំងពាណិជ្ជកម្ម ទីតាំងប្រជុំ សណ្ឋាគារ មន្ទីពេទ្យ ផ្សារទំនើប និងកន្លែងលំហែកាយជាដើម។ ពោលគឹក្រុមហ៊ុនអភិវឌ្ឍន៍មួយនេះ នឹងបើកទំព័រប្រវត្តិសាស្រ្តថ្មីមួយនៅតំបន់បឹងកក់នេះ ដោយដាក់ឈ្មោះថា ភ្នំពេញ ស៊ីធី សេនធ័រ «ទីក្រុងគជរបស់កម្ពុជា»។

គួររំលឹកថា សក្តានុពលជុំវិញតំបន់នេះ ពោលបើក្រឡេកមើលទៅភាគខាងកើតនៃតំបន់អភិវឌ្ឍន៍បឹងកក់ គេឃើញមានដូចជា អគារពាណិជ្ជកម្មកាណាឌីយ៉ា និងអគារវឌ្ឍនៈ ហើយស្ថិតនៅជាន់ទី ១៤ នៃអគារដ៏ខ្ពស់ស្គឹមស្គៃមួយនេះ ក៏មានសណ្ឋាគារផ្កាយ៥ របស់អាមេរិក គឺសណ្ឋាគារ Rose Wood ដែលកំពុងតែដំណើរការ។ មិនតែប៉ុណ្ណោះ ម្តុំជិតអគារនេះ ក៏មានធនាគារជាច្រើនហើយជិតតំបន់បឹងកក់នេះតែម្តង ក៏មានផ្សារទំនើប Parkson និងអគារពាណិជ្ជកម្មរបស់ The Gate Way ជាដើម ដែលធ្វើឱ្យទីក្រុងមួយនេះកាន់តែមានកិត្យានុភាព។

អគារកាណាឌីយ៉ា និងអគារវឌ្ឍនៈ ដែលថតពីតំបន់បឹងកក់

បើតាមការព្យាកររបស់ក្រុមហ៊ុន ភ្នំពេញ ស៊ីធី សេនធ័រ បង្ហាញថា គិតត្រឹមឆ្នាំ២០២៥ ទីក្រុងគជនេះ នឹងមានលំនៅឋានស្នាក់នៅ ៥ម៉ឺន ៦ពាន់ខ្នង ហើយនឹងមានមនុស្ស ១៩ម៉ឺននាក់ មកកម្សាន្តជារៀងរាល់ថ្ងៃ៕

អត្ថបទ៖ ឈុត សិរីឧត្តម