អតីតប្រធានគណបក្ស១ត្រូវតុលាការតម្កល់ទោស៥ឆ្នាំដដែលពីបទប្រមាថកងទ័ព

2018-05-18 06:52:22
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

នៅថ្ងៃទី១៨ ខែឧសភា ឆ្នាំ២០១៨ នេះ លោក ឃឹម ប៉ុណ្ណ ប្រធានក្រុមប្រឹក្សាជំនុំជម្រះតុលាការកំពូល សម្រេចតម្កល់សាលដីកាសាលាឧទ្ធរណ៍ ទុកជាបានការដដែល ពោលគឺលោក សួន សេរីរដ្ឋា អតីតប្រធានគណបក្ស អំណាចខ្មែរ ត្រូវជាប់គុក៥ឆ្នាំដដែល ក្នុងករណីប្រមាថធ្ងន់ធ្ងរលើកងទ័ព។

ក្នុងពេលសវនាការ លោក សួន សេរីរដ្ឋា ទទួលស្គាល់កំហុសថា ខ្លួនពិតជាបានសរសេរសារ នយោបាយផ្សាយលើទំព័រហ្វេសប៊ុករបស់ខ្លួន ក្នុងន័យប្រមាថកងទ័ពប្រាកដមែន ។ លោកបន្តថា បន្ទាប់ពីទទួលស្គាល់កំហុស លោកក៏បានចេញលិខិតសុំទោសជាសាធារណៈគោរពជូនសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាផងដែរ។

លោក សួន សេរីរដ្ឋា អតីតប្រធានគណបក្សអំណាចខ្មែរ/ រូបភាព៖ ដើមអម្ពិល

លោកសួន សេរីរដ្ឋា ជាប់ចោទពីបទ “ញុះញង់កុំឲ្យយោធិនស្ដាប់បង្គាប់ បទធ្វើឲ្យខូចទឹកចិត្តកងទ័ព និងបទញុះញង់ឲ្យប្រព្រឹត្តបទឧក្រិដ្ឋជាអាទិ៍ តាមមាត្រា៤៧១ មាត្រា៤៧២ មាត្រា៤៩៤ និងមាត្រា ៤៩៥ នៃក្រមព្រហ្មទណ្ឌ”។

លោក សួន សេរីរដ្ឋា ត្រូវបានសមត្ថកិច្ចនគរបាលយុត្តិធម៌នៃស្នងការដ្ឋាននគរបាលរាជធានីភ្នំពេញ ឃាត់ខ្លួនពាក់ព័ន្ធនឹងអង្គហេតុនៃការបង្ហោះសារជាសាធារណៈលើផេកឈ្មោះ Soun Serey Ratha លើបណ្ដាញសង្គមហ្វេសប៊ុក កាលពីថ្ងៃទី១២ ខែសីហា ឆ្នាំ២០១៧ ដែលសារនោះ មានចរិតបង្កគ្រោះ ថ្នាក់ដល់វិស័យការពារជាតិ។

យោងតាមសេចក្ដីថ្លែងការណ៍របស់អយ្យការអមសាលាដំបូង រាជធានីភ្នំពេញ សំណុំរឿងលោកសួន សេរីរដ្ឋា ជាករណីបទមជ្ឈិមជាក់ស្ដែង៕

ប្រភព៖ ដើមអម្ពិល ប្រែសម្រួល៖ ឈាង.