ចិន ចាប់អារម្មណ៍ផលិតផលខ្មែរ ៥យ៉ាង ដើម្បីនាំចូលទៅទីផ្សាររបស់ខ្លួន

2018-05-19 03:48:20
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រតិភូខេត្តក្វាងស៊ីនៃសាធារណរដ្ឋប្រជាមានិតចិន បានបង្ហាញចេតនាជួយសម្របសម្រួលឲ្យកម្ពុជាអាចនាំផលិតផលស្វាយ ស្វាយចន្ទី មៀន ម្រេច និងទឹកមាត់ត្រចៀកកាំ ចូលទៅប្រទេសចិនឲ្យបាននាពេលខាងមុខ។

ការលើកឡើងរបស់ភាគីចិននេះ ត្រូវបានធ្វើឡើងនៅក្នុងជំនួបពិភាក្សារវាងលោក ស៊ាង ថៃ អគ្គនាយកជំរុញពាណិជ្ជកម្ម នៃក្រសួងពាណិជ្ជកម្ម និង លោក Liang Yi អគ្គនាយករងនៃភ្នាក់ងារជំរុញការវិនិយោគខេត្តក្វាងស៊ី នាល្ងាចថ្ងៃទី១៨ ខែឧសភា ឆ្នាំ២០១៨ នៅទីស្តីការក្រសួងពាណិជ្ជកម្ម។

ម្រេចកម្ពុជា

លោក Liang Yi ថា លោកនឹងរាយការណ៍ទៅមន្រ្តីនិងអាជ្ញាធរចិនពាក់ព័ន្ធដើម្បីចូលរួមដោះស្រាយឲ្យកម្ពុជាអាចនាំផលិតផលស្វាយ ស្វាយចន្ទី មៀន និងម្រេច ចូលប្រទេសចិនបាន។ ដោយឡែក ចំពោះផលិតផលទឹកមាត់ត្រចៀកកាំវិញ ភាគីចិន នឹងសហការជាមួយប្រទេសម៉ាឡេស៊ី បង្កើតជាក្រុមជំនាញមួយ ដើម្បីជួយសម្របសម្រួលយ៉ាងណាឲ្យកម្ពុជាអាចនាំចូលទឹកមាត់ត្រចៀកកាំទៅកាន់ប្រទេសចិនបានដូចប្រទេសម៉ាឡេស៊ីផងដែរ។

លោក Liang Yi បានជម្រាបថា នៅកម្ពុជាមានក្រុមហ៊ុនមកពីខេត្តក្វាងស៊ីជាច្រើន បានកំពុងធ្វើប្រតិបត្តិការអាជីវកម្ម ហើយនៅថ្ងៃខាងមុខ លោកនឹងខិតខំកៀងគរវិនិយោគិនខេត្តក្វាងស៊ី ឲ្យចូលមកបណ្តាក់ទុនថែមទៀតនៅកម្ពុជា ដើម្បីឈានទៅសម្រេចគោលដៅយុទ្ធសាស្ត្រផ្លូវមួយ ខ្សែក្រវាត់មួយ ដែលផ្តួចផ្តើមដោយលោក ស៊ី ជិនពីង ប្រធានាធិបតីចិន។

លោក Liang Yi បានបន្តថា មានក្រុមហ៊ុនមកពីខេត្តក្វាងស៊ីដ៏ធំមួយ កំពុងបោះទុនវិនិយោគលើកំពង់ផែក្រុងព្រះសីហនុ បើសិនជាគម្រោងនេះទទួលជោគជ័យ កម្ពុជាអាចដឹកជញ្ជូនទំនិញតាមផ្លូវទឹកត្រង់ទៅប្រទេសចិនតែម្តង។

លោក ស៊ាង ថៃ អគ្គនាយកជំរុញពាណិជ្ជកម្ម នៃក្រសួងពាណិជ្ជកម្ម និង លោក Liang Yi អគ្គនាយករងនៃភ្នាក់ងារជំរុញការវិនិយោគខេត្តក្វាងស៊ី នាល្ងាចថ្ងៃទី១៨ ខែឧសភា ឆ្នាំ២០១៨ នៅទីស្តីការក្រសួងពាណិជ្ជកម្ម (រូបថត៖ ក្រសួងពាណិជ្ជកម្ម

សូមជម្រាបថា កម្ពុជា ត្រូវបានអនុញ្ញាតឲ្យនាំចូលទៅប្រទេសចិនបានតែ អង្ករ ដំឡូងមី និងពោតប៉ុណ្ណោះ៕

អត្ថបទ៖ លាភ.