កម្ពុជា ប្រារព្ធ "ទិវាជាតិនៃការចងចាំ" ២០ឧសភា

2018-05-20 01:51:21
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

នៅថ្ងៃទី២០ ខែឧសភា ឆ្នាំ២០១៨នេះ គឺជាឆ្នាំដំបូង ដែលកម្ពុជា ប្រារព្ធ "ទិវាជាតិ នៃការចងចាំ" ដើម្បីរំលឹក និងគោរពដល់វិញ្ញាណក្ខន្ធ និងការឈឺចាប់របស់ជនរងគ្រោះពីឧក្រិដ្ឋកម្ម ដែលបានកើតឡើងក្នុងរបបខ្មែរក្រហម (១៧មេសា ១៩៧៥- ៦ ខែមករា ឆ្នាំ១៩៧៩)។

ប្រជាពលរដ្ឋ ត្រូវបង្ខំឱ្យធ្វើពលកម្ម ក្នុងរបបខ្មែរក្រហម។ រូបថត៖ មជ្ឈមណ្ឌលឯកសារកម្ពុជា

សូមជម្រាបថា កាលពីថ្ងៃទី១៤ ខែកុម្ភៈ ឆ្នាំ២០១៨ រាជរដ្ឋាភិបាលកម្ពុជា បានចេញអនុក្រឹត្យ កំណត់យកថ្ងៃ២០ ឧសភា រៀងរាល់ឆ្នាំជា “ទិវាជាតិនៃការចងចាំ” ដោយបានកំណត់យកជាថ្ងៃឈប់សម្រាកជាសាធារណៈ ដើម្បីរម្លឹកដល់ជនរងគ្រោះដែលបានស្លាប់ រួមទាំងប៉ះប៉ូវផ្លូវចិត្ត និងផ្នែកសង្គមដល់អ្នកដែលឆ្លងកាត់សម័យខ្មែរក្រហម ចូលរួមផ្សះផ្សាជាតិ និងលើកកម្ពស់ការផ្សព្វផ្សាយ និងយល់ដឹងពីអំពើឃោរឃៅ ដែលកើតមានក្នុងរបបខ្មែរក្រហម។

ក្រសួងការងារ និងបណ្តុះបណ្តាលវិជ្ជាជីវៈ បានចេញប្រកាស ស្តីពីការឈប់សម្រាកនៅថ្ងៃទិវាជាតិនៃការចងចាំ ដោយក្នុងលិខិតចុះថ្ងៃទី២១ ខែកុម្ភៈ ឆ្នាំ២០១៨ លោក អ៊ិត សំហេង រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ បានសម្រេចអនុញ្ញាតឲ្យកម្មករនិយោជិតនៃសហគ្រាស គ្រឹះស្ថានទាំងអស់ ឈប់សម្រាកការងារ ដោយមានប្រាក់ឈ្នួល នៅថ្ងៃទី២០ ខែឧសភា ជារៀងរាល់ឆ្នាំ។ ប៉ុន្តែដោយថ្ងៃ២០ឧសភា នៅឆ្នាំនេះ ចំថ្ងៃអាទិត្យ ដូច្នេះរដ្ឋមន្ត្រីក្រសួងការងារ បានសម្រេចឲ្យកម្មករ និយោជិត ត្រូវបានឈប់សម្រាកមួយថ្ងៃបន្តទៀត គឺឈប់សម្រាកនៅថ្ងៃចន្ទ ទី២១ ខែឧសភា។

សូមរម្លឹកថា នៅថ្ងៃទី២០ ខែឧសភា ជារៀងរាល់ឆ្នាំ អាជ្ញាធររាជធានីភ្នំពេញ តែងតែប្រារព្ធទិវារម្លឹកដល់ការឈឺចាប់នៃរបបខ្មែរក្រហមដោយធ្វើពិធីជួបជុំ នៅឯសារមន្ទីរប្រល័យពូជសាសន៍ជើងឯក ក្នុងខណ្ឌដង្កោ រាជធានីភ្នំពេញ៕