ករណីពុលនៅខេត្តក្រចេះ៖ ក្រសួងបរិស្ថានកំពុងធ្វើរបាយការណ៍ បន្ទាប់ពីទទួលបានលទ្ធផលពិសោធន៍ពីសិង្ហបុរី

2018-05-24 04:04:46
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងបរិស្ថាន បានទទួលលទ្ធផលពិសោធន៍ឈាមជនរងគ្រោះដែលពុលស្លាប់នៅខេត្តក្រចេះហើយ។ នេះបើតាមការបញ្ជាក់របស់លោក ទិន ពន្លក អគ្គលេខាធិការនៃអគ្គលេខាធិការដ្ឋានក្រុមប្រឹក្សាជាតិអភិវឌ្ឍន៍ដោយចីរភាព។

យ៉ាងណាក្ដី លោក ទិន ពន្លក មិនទាន់អាចបកស្រាយបានពីលទ្ធផលនោះទេ ដោយត្រូវរង់ចាំអ្នកជំនាញធ្វើរបាយការណ៍លម្អិតអំពីលទ្ធផលនោះជាមុនសិន។

ឆ្លើយទៅនឹងសំណួររបស់អ្នកកាសែត នៅក្នុងកម្មវិធីសិក្ខាសាលាបណ្ដុះបណ្ដាលស្ដីពីការប្រែប្រួលអាកាសធាតុសម្រាប់ថ្នាក់ដឹកនាំវ័យក្មេង និងយុវជនរាជធានីភ្នំពេញ នាថ្ងៃទី២៤ ខែឧសភា ឆ្នាំ២០១៨ នេះ លោក ទិន ពន្លក បាននិយាយថា៖ "ក្រសួងបរិស្ថានបានជូនសំណាកហ្នឹង (សំណាកឈាម) ទៅមន្ទីរពិសោធន៍សិង្ហបុរី ហើយលទ្ធផលទទួលបានហើយ ប៉ុនតែអ្នកជំនាញកំពុងបកស្រាយ"។

លោកបន្តថា "ខ្ញុំមិនទាន់អាចបកស្រាយ មុនអ្នកជំនាញចេញរបាយការណ៍លម្អិតបានទេ ប៉ុន្តែជារួម យើងឃើញថា មានធាតុម៉េតាណុល ក្នុងសំណាកឈាមរបស់ជនរងគ្រោះមួយចំនួន។ ឥលូវនេះក្រសួងបរិស្ថាន កំពុងធ្វើការជាមួយក្រសួងរ៉ែ និងថាមពល ដើម្បីរៀបចំរបាយការណ៍លម្អិតជូនប្រមុខរដ្ឋាភិបាល ផ្អែកទៅលើលទ្ធផលនៃការវិភាគនោះ"។

លោក ទិន ពន្លក ឆ្លើយសំណួរអ្នកកាសែត

ចំពោះសំណួរថាតើទឹកព្រែកទេរ នៅខេត្តក្រចេះ ពិតជាមានជាតិស្យានីត ដូចការលើកឡើងរបស់ក្រសួងឧស្សាហកម្ម និងសិប្បកម្ម រកឃើញឬយ៉ាងនោះ លោក ទិន ពន្លក បានបញ្ជាក់ដោយខ្លីថា ជំហានដំបូង គឺមានជាតិស្យានីតដែរ ប៉ុន្តែស្ថិតក្នុងកម្រិតមួយទាប។ លោកបានបញ្ជាក់ទៀតថា លោកមិនទាន់អាចបកស្រាយថាកម្រិតនៃជាតិស្យានីតនោះ អាចបង្កឲ្យមានការពុលដែរឬយ៉ាងណានោះទេ ពោលគឺត្រូវនៅចាំរបាយការណ៍របស់អ្នកជំនាញសិន។

គួររំលឹកដែរថា ករណីពុលនៅខេត្តក្រចេះ កាលពីដើមខែឧសភា ២០១៨ កន្លងទៅ មានការបកស្រាយផ្ទុយគ្នា រវាងរដ្ឋមន្រ្តី ២រូប ពោលគឺរដ្ឋមន្ត្រីលោកចម ប្រសិទ្ធ រដ្ឋមន្រ្ដីក្រសួងឧស្សាហកម្ម និងសិប្បកម្ម បានបញ្ជាក់ថា ការពុលនោះ គឺបណ្ដាលមកពីអាជីវកម្មរ៉ែ ដែលប្រើជាតិគីមីពុល (ស្យានីត) ចំណែករដ្ឋមន្រ្តីក្រសួងរ៉ែ និងថាមពល លោកស៊ុយ សែម បានអះអាងថា ករណីពុលនោះ គ្មានពាក់ព័ន្ធជាតិស្យានីតនោះទេ៕

ចុចអាន៖ ករណីពុលនៅខេត្តក្រចេះ៖ រដ្ឋមន្ត្រី ២រូប បកស្រាយផ្ទុយគ្នា

អត្ថបទ៖ សោភា