រឿងពុលស្លាប់នៅក្រចេះ៖ សម្ដេច ហ៊ុន សែន ព្រមានដករដ្ឋមន្ត្រី

2018-05-25 05:10:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្តេច ហ៊ុន សែន បានព្រមានដករដ្ឋមន្ត្រីណាដែលរំលោភបំពានអំណាច និងមិនគោរពឋានុក្រម និងកុំឲ្យមានការសាចទឹកដាក់គ្នានៅក្នុងរដ្ឋាភិបាល ពាក់ព័ន្ធករណីពុលស្លាប់នៅភូមិស្រែនន និងភូមិអាលច ឃុំកន្ទួត ស្រុកចិត្របុរី ខេត្តក្រចេះ កាលពីថ្ងៃទី៣ ខែឧសភា ឆ្នាំ២០១៨។ ការព្រមាននេះ បានធ្វើឡើងនៅក្នុងកិច្ចប្រជុំគណៈរដ្ឋមន្ត្រី នៅវិមានសន្តិភាព នាព្រឹកថ្ងៃទី២៥ ខែឧសភា ឆ្នាំ២០១៨ នេះ។

សម្ដេច ហ៊ុន ដឹកនាំប្រជុំគណៈរដ្ឋមន្រ្តី នៅព្រឹកនេះ (រូបភាព៖ ហ្វេសប៊ុកសម្ដេច ហ៊ុន សែន)

សម្តេចនាយករដ្ឋមន្រ្តីបានសង្កត់ធ្ងន់ថា “រឿងនេះមិនគួរឲ្យកើតមាននៅក្នុងគណៈរដ្ឋមន្ត្រីយើងសោះ ហើយជាការដាស់តឿន បើអស់លោកចង់រាយការណ៍ឲ្យខ្ញុំ អស់លោករាយការណ៍ ប៉ុន្តែអស់លោកមិនត្រូវយករបាយការណ៍ដែលរាយការណ៍ឲ្យខ្ញុំទៅប្រាប់អ្នកកាសែត មុនពេលដែលមកដល់នាយករដ្ឋមន្ត្រីនោះទេ ហើយបើមានកិច្ចការបន្ទាន់ វើសអាប់ ឬតេឡាក្រាម ឬឡាញ អស់លោកអាចទូរស័ព្ទមកខ្ញុំបានតើ បញ្ជូនមកតាមរយៈខ្ញុំបានតើ ម៉េចក៏ចាំបាច់ទៅនិយាយជាមួយអ្នកសារព័ត៍មានឲ្យស្រង់ព័ត៍មានវ៉ៃបកគ្នារវាងរដ្ឋមន្ត្រី សាចទឹក បាចទឹកដាក់គ្នាយ៉ាងដូច្នេះ នៅក្នុងពេលដែលរដ្ឋមន្ត្រីមួយទទួលបាននៅអំណាច ដើម្បីផ្សព្វផ្សាយបញ្ហានេះ នៅក្នុងការទទួលខុសត្រូវ អីចឹងទេ ខ្ញុំមានការឈឺចាប់ណាស់ជាមួយនិងអ្វីដែលបានកើតឡើង។”

ជនរងគ្រោះ ដោយសារការពុលនៅខេត្តក្រចេះ

ទាក់ទងករណីពុលស្លាប់នៅខេត្តក្រចេះ សម្តេចនាយករដ្ឋមន្ត្រី ហ៊ុន សែន បានឲ្យយករបាយការណ៍របស់ក្រសួងសុខាភិបាលដែលបានចេញកន្លងមកនេះ គឺជារបាយការណ៍ផ្លូវការ គ្មានអ្នកណាមួយដែលអាចបដិសេធនោះទេ។

សម្តេចនាយករដ្ឋមន្ត្រី បានបញ្ជាក់ថា “ខ្ញុំមានសិទ្ធិនឹងដេញចេញ នៅក្នុងពេលដែលរដ្ឋមន្ត្រីណាមួយរំលោភបំពានអំណាច ហើយមិនគោរពឋានុក្រម”។

សូមរម្លឹកថា ករណីពុលនេះ កើតឡើងនៅភូមិចំនួន៤ ក្នុងឃុំកន្ទួត ស្រុកចិត្របុរី ខេត្តក្រចេះ កាលពីថ្ងៃទី៣ ខែឧសភា ឆ្នាំ២០១៨ ដោយអ្នកភូមិជាច្រើន មានរោគសញ្ញា ឈឺពោះ ក្អួតចង្អោរ ឈឺក អស់កម្លាំង ទន់ដៃទន់ជើង វិលមុខ និងថប់ដង្ហើម។ រហូតដល់ថ្ងៃទី៧ ខែឧសភា ឆ្នាំ២០១៨ ចំនួនអ្នកស្លាប់ដោយសារករណីពុល បានកើនឡើងដល់ ១៣នាក់ និងជាច្រើននាក់ទៀត ត្រូវចូលសម្រាកនៅមន្ទីរពេទ្យ។ ចំណែកក្រសួងសុខាភិបាលកាលពីថ្ងៃទី៧ ខែឧសភា ឆ្នាំ២០១៨ បានចេញសេចក្ដីជូនព័ត៌មានមួយស្ដីពីករណីពុលស្រា និងសង្ស័យពុលទឹកនៅខេត្តក្រចេះ ដោយរកឃើញថា សំណាកស្រាដែលត្រូវបានពិសោធ មានផ្ទុកជាតិមេតាណុលខ្ពស់ ដែលធ្វើឲ្យពុល៕