រោងចក្រស៊ីម៉ងត៍តម្លៃ ២៣០លានដុល្លារ នៅបាត់ដំបង ត្រូវបើកសម្ពោធព្រឹកនេះ

2018-05-31 01:20:07
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

នៅព្រឹកថ្ងៃទី៣១ ខែឧសភា ឆ្នាំ២០១៨នេះ សម្តេចនាយករដ្ឋមន្រ្តី ហ៊ុន សែន បានអញ្ជើញធ្វើជាអធិបតីភាពក្នុងពិធីសម្ពោធដាក់ឱ្យប្រើប្រាស់រោងចក្រស៊ីម៉ងត៍បាត់ដំបង ខនស៍ ស៊ីមេន (Battambang Conch Cement Company Limited) ដែលមានទីតាំងនៅតំបន់ភ្នំដូនម៉ាយ ឃុំស្តៅ ស្រុករតនមណ្ឌល ខេត្តបាត់ដំបង។

រោងចក្រស៊ីម៉ងត៍បាត់ដំបង ខនស៍ ស៊ីមេន ដែលត្រូវសម្ពោធនាព្រឹកថ្ងៃទី៣១ ខែឧសភា ឆ្នាំ២០១៨ (រូបថត៖ FB សម្តេច ហ៊ុន សែន)

រោងចក្រស៊ីម៉ងត៍នេះ ត្រូវបានសង់នៅលើទីតាំងដែលមានផ្ទៃដីសរុបទំហំ ៣១៦ហិកតា និងប្រើរយៈពេលសាងសង់ចំនួន ១៨ខែ គិតចាប់តាំងពីចុងឆ្នាំ២០១៦។ ការបង្កើតរោងចក្រនេះ ប្រើទុនវិនិយោគប្រមាណ ២៣០លានដុល្លារអាមេរិក ដែលជាការវិនិយោគរួមគ្នារវាងក្រុមហ៊ុន Conch International Holding (HK) Limited និងក្រុមហ៊ុន Battambang KT Cement Co.,Ltd តំណាងដោយលោកឧកញ៉ា ស៊ី គង់ទ្រីវ និងលោកឧកញ៉ា វិញ ហួរ។

រោងចក្រស៊ីម៉ងត៍នេះ មានសមត្ថភាពផលិតស៊ីម៉ងត៍បានប្រមាណ ៥ពាន់តោនក្នុងមួយថ្ងៃ ឬស្មើនឹងជិត ២លានតោនក្នុងមួយឆ្នាំ។

គួរបញ្ជាក់ថា នេះជារោងចក្រស៊ីម៉ត៍ទី២ហើយ ដែលត្រូវបានបើកសម្ពោធនៅក្នុងឆ្នាំ២០១៨នេះ ដោយកាលពីថ្ងៃទី៨ ខែកុម្ភៈ ឆ្នាំ២០១៨ សម្តេច ហ៊ុន សែន ក៏បានអញ្ជើញបើកសម្ពោធដាក់ឱ្យប្រើប្រាស់រោងចក្រស៊ីម៉ត៍របស់ក្រុមហ៊ុនជីបម៉ុង អ៊ីនស៊ី ស៊ីមេន ខបភើរេសិន (CMIC) នៅស្រុកបន្ទាយមាស ខេត្តកំពត។ រោងចក្រនេះ មានសមត្ថភាពផលិតស៊ីម៉ងត៍ ២លានតោនក្នុង១ឆ្នាំ៕

អត្ថបទពាក់ព័ន្ធ៖ កម្ពុជា មានសមត្ថភាពផលិតស៊ីម៉ងត៍បាន ៧លានតោន ក្នុង១ឆ្នាំ ចាប់ពីឆ្នាំនេះទៅ

អត្ថបទ៖ សំភី